Мадриднинг “Атлетико” клуби ҳужумчиси Хулиан Алварес фаолиятини “Барселона”да давом эттиришни истамоқда. Бу ҳақда Fichajes нашри хабар берди.
Манбага кўра, аргентиналик футболчи аллақачон яқинларига 2026 йилнинг ёзида Каталонияга кўчиб ўтишни хоҳлаётганини айтган. Алварес трансфер юзасидан “Атлетико” раҳбариятига босим ўтказишга ҳам тайёр.
Футболчининг бундай қарорга келишига бош мураббий Диэго Симеоненинг янги тактик ғоялари сабаб бўлган. Алварес ушбу ўзгаришлардан норози. Шу боис у “Барселона”га ўтиб, Роберт Левандовскининг ўрнини эгалламоқчи. Сабаби, каталонияликлар польшалик ҳужумчи билан шартномани узайтиришни режалаштирмайапти.
Шу билан бирга, трансферга тўсқинлик қилиши мумкин бўлган асосий омил — Алвареснинг нархи. Унинг қиймати қарийб 80 миллион еврога баҳоланмоқда. “Барселона” эса катта харидларни амалга оширишга тайёр эмас.
Маълумот учун, жорий мавсум 25 ёшли Алварес Испания Ла Лигасида 3 та учрашувда майдонга тушиб, ўз ҳисобига 1 та гол ёздириб қўйган.
