Россияда 1-сентябрдан бошлаб қўшимча давлат божлари жорий этилди. Булар қаторига рўйхатдан ўтказиш, миграция ҳисоби ва меҳнат фаолиятига рухсат бериш билан боғлиқ тўловлар ҳам киради. Ушбу ўзгартиришлар Россия Федерацияси Солиқ кодексига киритилган бўлиб, 1-сентябрдан эътиборан кучга кирди, дея хабар бермоқда ТАСС.
Булар орасида чет эл фуқаросига ёки фуқаролиги бўлмаган шахсга патент бериш ёхуд қайта расмийлаштириш учун 4200 рубл, ишлаш учун рухсатноманинг амал қилиш муддатини узайтириш учун 4200 рубл бож мавжуд. Шунингдек, ишлаш учун рухсатнома дубликатини бериш, мигрант ёки фуқаролиги бўлмаган шахснинг ишлаш учун рухсатномасидаги маълумотларга ўзгартиришлар киритиш ёки патент дубликатини бериш учун 2100 рубл миқдорида бож белгиланган.
Бундан ташқари, чет эллик ходимларни жалб қилиш ва улардан фойдаланиш учун рухсатномалар дубликатларини бериш, шунингдек уларга ўзгартиришлар киритиш учун 2100 рубл, чет эл фуқаросининг Россия Федерациясида вақтинча бўлиш муддатини узайтириш учун 1000 рубл ва турган жойи бўйича ҳисобга қўйиш учун 500 рубл миқдорида давлат божи жорий этилган.
Таъъкидланишича, ҳукумат давлат божларининг янгиланиши мигрантларнинг ўзларини ҳам ҳужжатларга ва уларнинг амал қилиш муддатларига янада масъулиятлироқ ёндашишга ундашини кутмоқда.Бундан аввал Россияда мигрантлар имтиҳонига аёллар билан мулоқот қилиш қоидаларини киритиш таклиф этилганди.
Июл ойи охирида Россиянинг Санкт Петербург шаҳрида патентга эга бўлган муҳожирларнинг такси хизматларида ишлаши тақиқланганди.
