Мексиканинг Сюдад-Хуарес шаҳридаги крематорийда куйдирилмаган 381 кишининг жасади топилди. Бу ҳақда Чиуауа штати прокуратурасига асосланиб, La Jornada газетаси хабар берди.
“Дафн этиш агентликларига хизмат кўрсатувчи муассаса фирибгарлик қилган. Жасадлар куйдирилмаган, марҳумларнинг қариндошларига эса уларнинг яқинларига тегишли бўлмаган кул берилган”, дейилади хабарда.
Штат прокурори Сесар Хауреги Моренонинг тушунтиришича, икки киши — корхона эгаси ва ходимлардан бири қамоққа олинган. Уларга инсон қолдиқлари билан нотўғри муомала қилиш, санитария қоидаларини бузиш, рухсатсиз дафн этиш ва фирибгарлик моддалари бўйича айблов қўйилган.
“Улар шунчаки жасадларни олиб кетишган, эҳтимол, хизмат кўрсатиш учун пул олишган, лекин амалда ҳеч нарса қилишмаган ва жасадларни тўплаб боришган”, дейди прокурор.
Крематорий беш-олти хонадан иборат кичик бино бўлиб, унда юзлаб жасадлар “жиноий бепарволик” оқибатида бир-бирининг устига тахланган.
“Бу фожиа ва очиқ-ойдин масъулиятсизлик, чинакам ҳақорат. Биз муносиб тарзда куйдирилмаган жасадларни қутқариш ҳақида гапирмоқдамиз”, деб таъкидлади прокурор.
Бундан олдин Мексиканинг Веракрус штатида қуролли ҳужум вақтида ҳукмрон Морена партиясидан Тексистепек шаҳри мери лавозимига номзод Есения Лара Гутеррес ҳалок бўлганди. Ҳодиса тўғридан-тўғри эфирга узатилаётган оммавий тадбир пайтида содир бўлган. Ҳужум аёл кўчада маҳаллий аҳоли билан саломлашиб юрган пайтда юз берган.
