Руминиянинг собиқ президенти Ион Илиескуга ўпка саратони ташхиси қўйилгандан сўнг, у реанимация бўлимига ётқизилди. Бу ҳақда Бухарестдаги Профессор доктор Агриппа Ионеску шифохонаси маъмуриятининг матбуот хизмати ўзининг Facebook саҳифасида маълум қилди.
Аниқланишича, 11 июнь куни собиқ президент реанимация бўлимига ётқизилган ва унга ўпка саратони ташхиси қўйилган. Ўша кундан бери у шифокорларнинг доимий назорати остида реанимация бўлимида ётибди.
“Ҳозирги пайтда беморнинг ҳуши жойида, юрак фаолияти кўрсаткичлари меъёрда, мустақил нафас олмоқда, аммо қўшимча кислород ёрдами зарур”, дейилади хабарда.
Шифохона маъмурият Илиескунинг аҳволи касалликнинг зўрайиши, шунингдек, ёши ва бошқа касалликлар туфайли анча оғирлашганини таъкидлаган. У реанимация бўлимида даволанишни давом эттирмоқда.
“Ўз-ўзига хизмат кўрсатиш ва ҳаракатланиш қобилияти деярли бутунлай чекланган”, дея аниқлик киритди шифохона матбуот хизмати.
Ион Илиеску 95 ёшда бўлиб, 1990-1996 ва 2000-2004 йилларда Руминия президенти лавозимида ишлаган.
Бундан олдин АҚШнинг собиқ президенти Жо Байденга ҳам саратоннинг агрессив шакли ташхиси қўйилганди. 2025 йил май ойида Оқ уйнинг собиқ раҳбари сийдик ажратишдаги муаммолар туфайли тиббий кўрикдан ўтган ва унда ўсмалар ҳамда суяк метастазлари аниқланган.
