Россия 12 июнга ўтар кечаси Shahed типидаги ҳужумчи дронлардан фойдаланган ҳолда яна Харьков шаҳрини ўққа тутган. Бу ҳақда Deutsche Welle хабар берди.
Шаҳар мери Игор Тереховга кўра, Россия ҳарбийлари бир кечада Харьковга 12 та зарба берган. Дронлардан бири мактаб ҳудудига, иккинчиси эса болалар боғчаси майдончасига келиб урилган.
Бундан ташқари, Харьковнинг Салтовский туманидаги 2 та турар жой биноси ва фитнес маркази ҳам зарбалар қурбони бўлган. Ҳужум оқибатида камида 11 киши, жумладан, 4 нафар бола яралангани очиқланган.
“Турар жойлар, таълим муассасалари, болалар боғчалари ва инфратузилма объектлари ёниб кетди. Ўнлаб машиналар шикастланган, мактаблар ва уйларнинг ойналари синган”, деди Терехов.
Харьков кеча, 11 июнга ўтар кечаси ҳам рус ҳарбийлари томонидан ўққа тутилганди. Қуролли кучлар 17 та Shahed дронлари билан Харьковнинг 2 тумани — Слободский ва Основянский туманларига зарбалар берганди. Ҳужум оқибатида 3 киши ҳалок бўлиб, 60 киши яраланганди. Улар орасида 7 нафар бола бўлган.
Июнь ойида Россия ҳарбийлари бир неча марта Харьковга бомба ташлаган. 7 июнга ўтар кечаси рус қўшинлари шаҳарга Украинага босқин бошланганидан бери энг йирик зарбаларни берган. Тереховга кўра, шаҳарга 48 та “шаҳедл ҳужумчи дронлари, 2 та ракета ва 4 та бошқариладиган ҳаво бомбаси учирилган. Ўша ҳужумда 6 киши ҳалок бўлганди.
