Париждаги “Гревен” музейидан Франция президенти Эммануэл Макроннинг мум ҳайкали ўғирлаб кетилди. Бу ҳақда BFМTV телеканали хабар берди.
Манбага кўра, Эммануэл Макроннинг мум ҳайкали 2 июнь душанба куни эрталаб Парижнинг 9-округида жойлашган “Гревен” музейидан ўғирланган.
Дастлабки тергов натижаларига кўра, музейга сайёҳ қиёфасида ташриф буюрган икки аёл ва бир эркак кейинчалик музей ходими либосига ўранган. Улар 40 минг евро қийматидаги мум ҳайкални олиб чиқиб кетган.
Ўғрилар экспонатни фавқулодда чиқиш йўлидан олиб ўтиб, адёл остига яшириб, қочиб кетишган.
Кейинроқ ўзини Greenpeace фаоли деб таништирган шахс музей билан боғланиб, акция учун жавобгарликни ўз зиммасига олган. Музей маъмурияти полицияга мурожаат қилган.
Телеканал хабарига кўра, ҳуқуқбузарлар ҳайкал билан Париждаги Россия элчихонаси биносига бориб, у ерда Франция ва Россиянинг иқтисодий ҳамкорлигига қарши қисқа муддатли намойиш ўтказишган.
Париждаги Монмартр тепалигида жойлашган “Гревен” музейи 1882 йилда Буюк Британиянинг Тюссо хоним мум ҳайкаллари музейи намунасида ташкил этилган. Унинг коллекциясида асосан Франция тарихи ва маданиятини акс эттирувчи 450 га яқин персонаж мавжуд.
