“Барселона” спорт директори Деку каталонияликлар аъзоси Ламин Ямалнинг келажаги ҳамда унинг “Олтин тўп” олиш эҳтимоли ҳақида фикр билдирди. Бу ҳақда Mundo Deportivo нашри хабар берди.
Унинг фикрича, “Барселона”да бу совринни ютиши мумкин бўлган футболчилар кўп, лекин Ямал кўпроқ муносиб:
Мен Ямалнинг “Олтин тўп”ни қўлга киритишини истайман. Бизнинг жамоада бу мукофотга лойиқ бир нечта футболчи бор. Менимча, Ламин уларнинг ичида энг муносиброғи. Рафинья ҳам жорий мавсумда ажойиб ўйин кўрсатди. Қолганини вақт кўрсатади, деди Деку.
17 ёшли Ямал жорий мавсумда “Барселона” билан Ла Лига доирасидаги 34 та учрашувда майдонга тушиб, ўз ҳисобига 9 та гол ва 13 та голли узатма ёздириб қўйган. Унинг клуб билан шартномаси 2026 йил якунига етади, бироқ томонлар янги битим борасида келишувга эришгани айтилмоқда. Transfermarkt портали унинг қийматини 180 миллион еврога баҳоламоқда.
