“Милан” клуби ярим ҳимоячиси Теяни Рейндерс ёзги трансфер ойнасида қайси жамоага ўтиши борасида қарор қабул қилган. Sky Sport France нашрининг хабар беришича, 26 ёшли футболчи агентларига “Манчестер Сити”га ўтишни исташини айтган.
Теянига Мадриднинг “Реал” клуби ҳам жиддий қизиқиш билдираётган бўлса-да, нидерландиялик футболчи анча вақтдан бери Пеп Гвардиола қўл остида шуғулланишни орзу қилиб келади. У ёшлик чоғидан “Барселона”нинг тики-така услубини ёқтиради ва шу боис “Сити”га ўтишни истамоқда.
“Шаҳарликлар” аллақачон футболчи билан шартнома борасида дастлабки музокараларни олиб борган ва келишувга эришгани хабар қилинмоқда.
Маълумот учун, Рейндерс жорий мавсумда “Милан” сафида 53 ўйинда майдонга тушиб, 15 та гол ва 5 та голли узатма амалга оширган. Унинг клуб билан шартномаси 2030 йилгача амал қилади. Transfermarkt портали Рейндерснинг қийматини 50 миллион еврога баҳоламоқда.
