Мадриднинг “Реал” клуби бош мураббийи бўлиши кутилаётган Хаби Алонсо Килиан Мбаппе ва Винисиус Жуниордан қандай фойдаланиш борасида режа тузиб қўйган. Бу ҳақда Cadena SER нашри хабар берган.
Унга кўра, испаниялик мутахассис иккита ҳужумчидан иборат тактик схемадан фойдаланишни режалаштирган — 5-3-2 ёки 4-4-2.
Мбаппе ҳамда Винисиус асосий ҳужум жуфтлиги сифатида кўрилмоқда. Бразилиялик бошқа бир футболчи — Родриго ёзда “қироллик клуби”дан кетиши мумкин. Айни пайтда унга Европанинг кўплаб клублари, хусусан, “Манчестер Сити” жиддий қизиқиш билдирмоқда. Агар барчаси ўхшаса, Родриго бошқа чемпионатга ўтади. Бу ҳолат Алонсонинг ишини енгиллаштиради.
Испаниялик мутахассиснинг “Реал”даги фаолияти июнь ойидан бошланиши кутилмоқда. У клубдан кетаётган Карло Анчелотти ўрнини эгаллайди. Яқинда “Байер” раҳбарияти Алонсо жамоани тарк этишини расмий равишда тасдиқлади.
Эслатиб ўтамиз, Анчелотти фаолиятини Бразилия терма жамоаси бош мураббийи сифатида давом эттиради. У Испания чемпионатида мавсум якунлангач, “пентакампеонлар” сафида иш бошлайди.
