“Байер” устози Хаби Алонсо жорий мавсум якунида немис клубини тарк этади. 43 ёшли испаниялик мутахассис бу ҳақда расман эълон қилди.
Мураббий клуб расмий саҳифасига берган баёнотида доим “Байер” мухлиси бўлиб қолишини айтди:
Мен “Байер” клубига, футболчиларга, мураббийлар штабига ва мухлисларимизга чуқур миннатдорчилигимни билдирмоқчиман. Бизнинг муваффақиятимиз – бу жамоавий меҳнат натижаси. Клуб менга катта ишонч билдирди ва Бундеслигадаги илк ғалабасини ҳақли равишда қўлга киритди. Бу ютуқни амалга оширишда ҳиссаси бўлган ҳар бир кишига ташаккур билдираман ва уларнинг олдида бош эгаман. “Байер”га омад тилайман. Мен доим Леверкузен клубининг мухлиси бўлиб қоламан, деди Алонсо клуб матбуот хизматига берган баёнотида.
Хаби Алонсо бошчилигида “Байер” учта совринни қўлга киритди: Бундеслигада чемпионлик, Германия Кубоги ва Германия Суперкубоги.
Маълумотларга кўра, испан мутахассиси яқин ҳафталарда Мадриднинг “Реал” клуби бош мураббийига айланиши мумкин. “Қироллик клуби” Алонсо учун “Байер”га 12 миллион евро тўлаши маълум бўлди.
