Португалия президенти Марселу Ребелу ди Соуза республика парламентини тарқатиб юбориш ва 18 май куни ўтказиладиган муддатидан олдинги сайловларни тайинлаш тўғрисидаги фармонни имзолади. Бу ҳақда Президент матбуот хизмати хабар берди.
“Республика президенти бугун республика ассамблеясини тарқатиб юбориш ва парламент сайловларини 18 майга белгилаш тўғрисидаги фармонни имзолади”, дейилади хабарда.
Президентнинг парламентни тарқатиб юбориш тўғрисидаги қарори 11 март куни депутатлар февралда бошланган сиёсий инқироз фонида бош вазир Луиш Монтенегру бошчилигидаги ҳукуматга ишончсизлик билдирганидан сўнг қабул қилинди.
Мамлакатдаги сиёсий инқироз бош вазир оиласига тегишли консалтинг компанияси билан боғлиқ манфаатлар тўқнашуви ҳақидаги айбловлар туфайли юзага келган.
Мухолифатнинг таъкидлашича, фирма хусусий компаниялар билан фойдали шартномалар тузган. Монтенегрунинг ўзи эса бу айбловларни рад этмоқда. Гап Монтенегру сиёсатга қайтишидан олдин асос солган ва ҳозирда унинг оиласи томонидан бошқарилаётган Спинумвива компанияси фаолияти ҳақида бормоқда.
Португалия бош вазири ҳукумат тепасида бир йилдан камроқ фаолият юритди. Ундан олдинги Бош вазир Антонио Кошта коррупция можароси туфайли истеъфога чиққан эди. Шундай қилиб, 18 майда ўтказиладиган сайловлар мамлакатдаги 2022 йилдан бери учинчи навбатдан ташқари сайлов ҳисобланади.
Португалия конституцияга кўра, бир палатали парламент (Республика ассамблеяси) барча Португалия фуқароларини вакиллик қиладиган орган ҳисобланади. У энг камида 180 ва кўпи билан 230 депутатдан ташкил топиши мумкин. Ҳозирги кунда парламент 230 депутатдан иборат таркибда бўлиб фаолият юритмоқда.
