Футбол бўйича Элит Осиё Чемпионлар Лигаси доирасидаги “Ан-Насср” ва “Истиқлол” ўртасидаги баҳс 10 март, душанба куни бўлиб ўтди. Унда риёдликлар 3:0 ҳисобида ғалаба қозонди. “Ан-Насср”нинг 2-голини Криштиану Роналду пенальти орқали киритди.
Шу тариқа португалиялик футболчи 30 ёшдан кейин киритган голлари сонини 464 тага етказди. Умуман олганда, ҳужумчи бутун фаолияти давомида 927 та гол киритган бўлса, шулардан 463 тасини 30 ёшгача, 30 ёшдан кейин эса 464 марта рақиб дарвозасини ишғол қилган.
Криштианунинг “Истиқлол” дарвозасига тепган 11 метрлик жарима тўпи фаолиятидаги 204-пенальти сифатида қайд этилди. Футболчи ушбу жарима зарбаларини 173 мартасини аниқ амалга оширган бўлса, 21 марта нуқтадан адашган.
40 ёшни қаршилаган футболчи фаолиятини тугатиш ниятида эмас. Аксинча, у янги марраларни кўзламоқда. Яқинда Роналду 1000 та гол урмоқчи эканини маълум қилган эди. Ҳозирча бу натижага эришиш учун 73 та гол қолган.
Маълумот учун, жорий мавсум португалиялик ҳужумчи Саудия чемпионатида 23 та ўйин ўтказиб, 18 та гол ва 3 та ассист муаллифига айланган. Унинг клуб билан шартномаси 2025 йилнинг ёзига қадар амал қилади.
