Қозоғистон президенти Қосим-Жўмарт Тўқаев республиканинг атом энергетикаси ривожланган давлатга айланиши учун расмийлар бир нечта атом электр станцияларини қуриш бўйича ишларни тезлаштириши кераклигини айтди.
“Биз атом электр станциялари қурилишини тезлаштиришимиз керак. Биз иккита йирик станция қурамиз, эҳтимол, учта. Биз Қозоғистонни ядро энергетикаси ривожланган, сунъий интеллектдан фаол фойдаланиладиган ва тўлиқ рақамлаштирилган давлатга айлантиришимиз керак”, деди Тўқаев.
Аввалроқ Тўқаев “Ана тили” газетасига берган интервьюсида Қозоғистонга юқори қувватли атом электр станцияси кераклигини айтган эди. У яқин келажакда улар республикада иккинчи, эҳтимол учинчи атом электр станциясини қуришга киришишларини инкор этмади.
Қозоғистонда 2024 йил 6 октябрда атом электр станциясини қуриш имконияти бўйича референдум ўтказилди. Республикада станция қурилишини сайловчиларнинг 71,12 фоизи қўллаб-қувватлади.
