Финляндия президенти Александр Стубб, агар керак бўлса, ҳафта ичида 280 минг аскарни сафарбар қилиши мумкинлигини айтди. Бу ҳақда Independent нашри Александр Стубб сўзларига таяниб ёзди.
Нашрнинг қайд этишича, Финляндия мудофаа соҳасига сармояларни кўпайтиришни бошлаган. 2022 йилдан бери мудофаа харажатлари ЯИМга нисбатан 0,9 фоизга ошди.
Олдинроқ Финляндия мудофаа вазири Антти Хакканен расмийлар мамлакатнинг йиллар давомида давом этиши мумкин бўлган кенг кўламли таъсирлар, ҳарбий босим ва эҳтимолий кенг кўламли урушларга қарши туриш қобилиятини кучайтиришини айтган эди. Унга кўра, финлар НАТО иттифоқчилари билан биргаликда мудофаа чораларини тайёрлайди.
10 декабрь куни президент Стубб финляндияликлар мамлакат мудофаа харажатларини оширишга тайёрланиши кераклигини айтганди. Унинг сўзларига кўра, мамлакат ўз манфаатларини кўзлаб бу ишни амалга оширади.
Ноябрь ойи охирида Финляндия Россия билан чегара яқинида кенг кўламли ҳарбий машғулотларни бошлаганди.
“Манёврларда 600 та транспорт ва жанговар ҳарбий техника, НH90 транспорт вертолёти ва МД 500 енгил вертолётидан фойдаланилади.
Ҳарбийлар ҳужумга ва мудофаага тайёргарлик кўриш, яқинлашиб келаётган душманни йўқ қилиш, шунингдек, тунда жанг қилиш ва қиш шароитида жанговар ҳаракатлар олиб боришни машқ қилади”, дея хабар берганди “Репорт” нашри.
