Қизил денгизда Америка ҳарбийлари адашиб, ўз қирувчи самолётларидан бирини уриб туширди. Иккала учувчи ҳам катапулта қила олди, улардан бири енгил жароҳатланган. Бу ҳақда Deutsche Welle хабар берди.
F/А-18 қирувчиси билан содир бўлган воқеа ҳақида АҚШ Қуролли кучлари Марказий қўмондонлиги маълум қилди. Унга кўра, “Гарри Труман” авиаташувчисидан учган самолётни “Геттисберг” эсминеци томонидан отилган ракета уриб туширган. Америка қўмондонлиги тўлиқ тергов ўтказилаётганини таъкидлади.
АҚШнинг ҳусий позицияларига ҳужуми
АҚШ қўшинлари минтақада, жумладан, Яманда фаолият юритаётган ҳусийлар гуруҳи таҳдидларига қарши курашиш учун жойлаштирилган. 21 декабрь куни ҳарбийлар Яман пойтахти Сана яқинидаги ҳусий позицияларига зарбалар берди. Бундан ташқари, Қизил денгиз устида ҳусийларга тегишли бир нечта дрон ва битта қанотли ракета уриб туширилди.
Ғазо секторида Исроил ва ҲАМАС гуруҳи ўртасидаги қуролли қарама-қаршиликнинг янги босқичи бошланганидан буён ҳусийлар мунтазам равишда Исроилдаги нишонларга ва Қизил денгиздаги кемаларга ҳужум қилмоқда. Бунга жавобан АҚШ ҳарбийлари уларнинг объектлари ва қурол-яроғ тизимларига зарбалар бермоқда. Қўшма Штатлардан ташқари, денгизда кемалар хавфсизлигини таъминлашда Буюк Британия ҳам иштирок этмоқда.
