Швейцария ҳукумати 2017 йилда қабул қилинган атом энергиясидан воз кечиш тўғрисидаги қарорни қайта кўриб чиқишни таклиф этди.
Бу қарор 2011 йилда Япониядаги “Фукусима” атом электр станциясида содир бўлган йирик фалокатга алоқадор эди. 2017 йилдаги референдумда швейсарияликлар янги атом электр станциялари қурилишини тақиқлашни қўллаб-қувватладилар, аммо мавжуд станцияларнинг хавфсиз деб топилгунча ишлашига рухсат берилди.
Ҳукумат электр энергиясининг барча экологик жиҳатдан хавфсиз турларини ишлаб чиқаришга рухсат бериш учун янги референдум ўтказиши кутилмоқда. Бунга атом энергияси ҳам киради, чунки у углерод-нейтрал ҳисобланади.
Швейцария Федерал кенгашининг аниқлик киритишича, 2017 йилдан буён вазият сезиларли даражада ўзгарган: хусусан, Россия-Украина уруши туфайли Европада газ таъминотида узилишлар юз берган.
Шундай бўлса-да, Швейцария учун қайта тикланадиган энергетикани ривожлантириш устувор вазифа бўлиб қолмоқда. Мамлакатдаги тўртта мавжуд атом станцияси, жумладан, дунёдаги энг қадимийларидан бири бўлган Безнау АЭСи мамлакат энергия истеъмолининг бир қисмини таъминлашни давом эттирмоқда.
