Туркия Бирлашган Миллатлар Ташкилотига 52 та давлат ҳамда иккита халқаро ташкилотнинг Исроилга қарши қурол эмбаргосини жорий этиш мурожаатидан иборат мактубини топширди. Бу ҳақда Anadolu хабар берди.
Мактубда босиб олинган Фаластин ҳудудларида, шунингдек, Ливан ва Яқин Шарқнинг бошқа ҳудудларида зўравонлик кучайиши ва халқаро ҳуқуқ нормаларининг бузилишидан чуқур хавотир билдирилган. Исроил ҳаракатлари оқибатида қурбонлар орасида аёллар ва болалар сони ортаётгани қайд этилган. Ушбу хавфли тенденцияни тўхтатиш учун фавқулодда чоралар кўриш зарурлиги таъкидланган.
Мактуб 1 ноябрь куни БМТ бош котиби Антониу Гутерришга, ноябрь ойида БМТ Хавфсизлик кенгашига раислик қилган Буюк Британия ва БМТ Бош ассамблеяси президенти Филемон Янгга юборилган.
Туркия Исроилга қуроллар етказиб беришни зудлик билан тўхтатишни халқаро ҳамжамиятнинг қонуний мажбурияти ва бурчи деб билади. Мактубни имзолаган давлатлар қаторига Туркия, Фаластин, Баҳрайн, Бангладеш, БАА, Боливия, Бразилия, Бруней Даруссалам, Буркина-Фасо, Жазоир, Жибути, Хитой, Индонезия, Марокаш, Гамбия, Жанубий Африка, Ироқ, Эрон, Қатар, Қозоғистон, Қирғизистон, Колумбия, Комор ороллари Иттифоқи, Кувайт, Куба, Ливия, Ливан, Малдив ороллари, Малайзия, Мексика, Миср, Мавритания, Намибия, Нигерия, Никарагуа, Норвегия, Покистон, Россия, Сент-Винсент ва Гренадин ороллари, Сан-Томе ва Принципи, Сенегал, Сомали, Судан, Саудия Арабистони, Чили, Тунис, Уммон, Иордания, Венесуэла, Вьетнам, Яман ва Зимбабве киради.
Шунингдек, ҳужжатга Араб давлатлари лигаси ва Ислом ҳамкорлик ташкилоти ўз имзоларини қўйган.
