2024 йилнинг 9 ойида Туркияга 41,8 миллион хорижий сайёҳ ташриф буюрди, бу ўтган йилнинг шу даврига нисбатан 6,7 фоизга кўпдир.
Бу ҳақда Туркия Маданият ва туризм вазирлиги маълум қилди.
Вазирилик маълумотларига кўра, ҳисобот даврида Россия Туркияга сайёҳлар оқими бўйича биринчи ўринни эгаллаган. 2024 йилнинг январь сентябрь ойларида келган россиялик сайёҳлар сони 5 миллион 473 минг 380 нафарни ёки умумий сайёҳлик оқимининг 13,08 фоизини ташкил этиб, ўтган йилнинг шу даврига нисбатан қарийб 6 фоизга ўсди.
Биринчи бешликка Россиядан ташқари Германия (5,16 миллион), Буюк Британия (3,68 миллион), Эрон (2,48 миллион) ва Болгария (2,17 миллион) ҳам кирган.
Статистик маълумотларга кўра, сентябрь ойида Россия Туркияга сайёҳлик оқими бўйича ҳам биринчи ўринни эгаллади.
Иккинчи ўринда Германия (772,6 минг киши), учинчи ўринда Буюк Британия (деярли 577 минг). Тўртинчи ва бешинчи ўринларни Эрон (380 минг) ва Болгария (304,3 минг) эгаллаган.
Сентябрь ойида Туркияга жами 6,54 миллион сайёҳ ташриф буюрди, бу ўтган йилга нисбатан 4,6 фоизга кўпдир.
Аввалроқ 2024 йилда Туркияга 60 миллион сайёҳ келиши кутилаётгани хабар қилинганди.
