Молдовада 20 октябрь куни бўлиб ўтган президентлик сайловлари ва мамлакатнинг Европа иттифоқига қўшилиши бўйича ўтказилган референдумда овозларини “сотган” фуқаролар жаримага тортилди. Бу ҳақда Deutsche Welle хабар берди.
Коррупцияга қарши курашиш миллий маркази полициядан “пассив сайлов коррупцияси” ҳолатлари бўйича 350 та хабар олган. Ушбу ҳуқуқбузарлик муносабати билан фуқаролар жами 1 миллион лейга яқин (52 000 евро) жаримага тортилган.
Молдова қонунчилигида “пассив сайлов коррупцияси” сайловчи ўзи ёки бошқа шахс учун сайлов ҳуқуқларини амалга ошириш ёки оширмаслик мақсадида шахсан ёки воситачи орқали ўзига тегишли бўлмаган ҳар қандай шаклдаги товарлар, хизматлар, имтиёзлар ёки афзалликларни талаб қилиши, қабул қилиши ёки олиши ҳисобланади.
Бундай ҳуқуқбузарлик учун жарима миқдори 25 минг лейдан 37 500 лейгача (1299-1949 евро) белгиланган.
Президентлик сайлови натижалари
Молдовада президентлик сайловининг биринчи тури натижаларига кўра, амалдаги давлат раҳбари Майя Санду 42 фоиз овоз олди. Унинг Россияни қўллаб-қувватловчи мухолифатдаги Социалистлар партиясидан бўлган рақиби, Молдова собиқ прокурори Александр Стояногло 26 фоиз овоз тўплади.
Молдованинг Европа иттифоқига қўшилиши бўйича референдумда интеграция тарафдорлари минимал устунлик билан ғалаба қозонди. Барча бюллетенларни санаб чиқиш натижаларига кўра, у 50,38 фоиз овоз олди.
