Францияда ҳибсга олинганида Telegram асосчиси Павел Дуров терговчиларга даромади бир дирҳам эканини айтган. Бу ҳақда Le Monde газетаси хабар берди.
Дирҳам — Дуров сўнгги йилларда яшаган БААнинг пул бирлиги. Бир дирҳам салкам 3 500 сўмга (26 сентябрдаги курс) тўғри келади. 2017 йилда Дуров солиқлар йўқлиги сабаб Telegram штаб-квартирасини Берлиндан Дубайга кўчирганди. 2022 йилда у БАА фуқаролигини олган.
Le Monde нашри таъкидлашича, Дуров ўзини зоҳид сифатида кўрсатишни ёқтирса-да, “деярли нол” маош олишига қарамай, мултимиллиардер ҳисобланади. У Forbes рейтингида 15,5 миллиард доллар бойлиги билан 127-ўринни эгаллайди. Bloomberg эса Дуровнинг бойлигини 9,07 миллиард долларга баҳолаган.
Тадбиркор Telegram акцияларининг асосий қисмига эгалик қилади. У март ойида Financial Timesъга берган интервьюсида компания 30 миллиард АҚШ долларига баҳоланганини айтган.
Павел Дуров 24 август куни Парижнинг Le Burje аэропортида қўлга олинганди. Тўрт кундан сўнг у 5 миллион евро миқдорида гаров эвазига қўйиб юборилган. Дуров ҳафтада икки марта полиция участкасига келиш шарти билан унга Франциядан чиқиш ман этилган.
