UFC президенти Дана Уайт аралаш яккакураш бўйича ирландиялик жангчи, икки вазн тоифасида собиқ чемпион Конор Макгрегорнинг октагонга қайтиши ҳақидаги саволга жавоб берди.
“Конор билан гаплашдим. Бу учрашувмас, шунчаки суҳбат эди. Ҳа, у жанг қилишни хоҳлайди, барчасини ҳал қиламиз. Лекин жорий йилда эмас. Макгрегор 2024 йилда октагонга кўтарилмайди”, — дейди Дана Уайт.
Маълумот учун, шу йилнинг июнь ойи охирида Макгрегор америкалик Майкл Чендлер билан жанг ўтказиши керак эди. Улар UFC-303 да жанг қилишлари керак эди. Аммо ирландиялик жангга тайёргарлик чоғида оёқ бармоғи синганидан сўнг жанг бекор қилинди.
Макгрегор сўнгги жангини 2021 йил июль ойи Дастин Порьега қарши ўтказиб, оёғини синдириб олганди. Порье техник нокаут эвазига ғалаба қозонган эди.
