Илон Маскнинг Twitter компанияси январь ойида аукцион ўтказади, унда компаниянинг Сан-Франсискодаги офисидан мингдан ортиқ нарсалар кимошди савдосига қўйилади. Бу ҳақда Teslarati хабар берди.
Маълум қилинишича, аукцион 17 январь кечқурун 18 январь эрталабгача давом этади. Лотлар орасида қаҳва тайёрловчи машина, столлар, шунингдек, компания рамзи бўлган кўк қушнинг «статуэтка»си бўлади. Аксарият маҳсулотлар 25 доллардан, баъзилари эса 50 доллардан бошланади. Янги эспрессо машиналари бир неча минг доллар туради.
Twitter компанияси номидан ким ошди савдосини Heritage Global Partners (HGP) компанияси ўтказади. Уларнинг айтишича, аукционнинг компания молиявий аҳволига ҳеч қандай алоқаси йўқ.
«Компания 44 миллиард долларга сотилган ва биз эса бир нечта стул, стол ҳамда компьютерларни сотамиз. Агар кимдир аукциондан тушган даромад Twitter хариди учун сарфланган маблағни тўлашига чин дилдан ишонса, хато қилади», — дейди HGP вакили Ник Дов.
Тадбиркор Илон Маск томонидан сотиб олинганидан сўнг, Twitter харажатларни камайтириш учун офис ижарасини тўлашни тўхтатди. Хусусан, Twitter’нинг Сан-Франсискодаги (Калифорния штати) бош офиси, шунингдек, компаниянинг бошқа мамлакатлардаги ваколатхоналари жойлашган бинолар учун ижара ҳақи тўлаш тўхтатилган. Бундан ташқари, компания ишдан бўшатилган ходимларга ишдан бўшатилиш нафақасини беришни ҳам тўхтатмоқчи.
