АҚШ президенти Жо Байден маъмурияти сайёрадаги энг бой одам — Илон Маскнинг хатти-ҳаракатлари миллий хавфсизликка таҳдид солиш-солмаслигини текшириш масаласини муҳокама қилишни бошлади. Бу ҳақда Bloomberg агентлиги ўз манбаларига таяниб хабар берди.
Уларнинг сўзларига кўра, ҳукумат, хусусан, Twitter ижтимоий тармоғини сотиб олиш бўйича битимни (унда Маскдан ташқари яна бир гуруҳ чет эл инвесторлари қатнашмоқда), шунингдек, бизнесменннинг Украинада Starlink сунъий йўлдош тармоғи фаолияти бўйича баёнотларини текширишни кўзда тутмоқда.
Bloomberg манбалари қайд этишича, яқинда Маск Украинага Starlink сунъий йўлдош алоқасини етказиб беришни тўхтатиш ҳақида таҳдид қилганидан кейин америкалик мансабдорлар хавотирга тушган. Шунингдек, бизнесмен «президент Владимир Путин учун манфаатли бўлган сулҳ таклифлари баён этилган кетма-кет твитларидан кейин, Россияга нисбатан тобора дўстона позицияни» эгаллаётганидан ташвишга тушган.
Bloomberg таъкидлашича, муҳокамалар бошланғич босқичда. Америкалик мансабдорлар ва разведка хизматлари агар Маскнинг хатти-ҳаракатларини текширишга қарор қилинса, қандай воситалардан фойдаланиш мумкин бўлиши ҳақида бош қотирмоқда. Маскнинг битимлари ва операцияларини АҚШнинг чет эл инвестициялари бўйича қўмитаси текширади, деган вариант кўриб чиқилмоқда.Илон Маск Украинадаги урушга қандай муносабатда?
3 октябрь куни Илон Маск Россия ва Украина ўртасида тинчликка эришиш учун ўзининг тўрт бандли сценарийсини таклиф қилганди, улардан бирига кўра Қрим Россияники деб тан олиниши керак. Кремль унинг ғояларини ижобий деб баҳолади, Киев эса тадбиркорни танқид қилди. Маск Украинани қўллаб-қувватлашини, лекин жаҳон урушини истамаслигини айтди. Сиёсатшунос Ян Бреммернинг таъкидлашича, Илон Маск можарони ҳал қилиш режасини эълон қилишдан олдин Владимир Путин билан гаплашган. Кремль ҳам, тадбиркорнинг ўзи ҳам буни рад этди.Маскнинг «режа»сини изоҳлар экан, Украина собиқ элчиси Андрей Мелник унга нисбатан сўкиниш иборасини қўллади ва «туёғини шиқиллатиш»ни маслаҳат берди.
Америкалик миллиардер эса шундан кейин Украина учун Starlink интернетини молиялаштиришни тўхтатишга қарор қилди.
Шу билан бир вақтда маълум бўлишича, SpaceX сентябрдаёқ Пентагонга Украина учун Starlink сунъий йўлдош алоқасини молиялаштиришни тўхтатмоқчилигини билдирган. Маскнинг сўзларига кўра, компания уруш бошидан буён бунга 80 миллион доллардан ортиқ маблағ сарфлаган. 15 октябрь куни эса Маск SpaceX Украинада бепул ишлашда давом этишини маълум қилди. Мавзуга доир:- Илон Маск Қримнинг Россия учун муҳимлигини таъкидлаб, ядро уруши хавфидан огоҳлантирди
- Илон Маск Россия ва АҚШ бир-бирини ярим соат ичида йўқ қила олишини айтди
- Путин «Украина Қримга бостириб кирса, Россия ядро қуролидан фойдаланиши эҳтимоли» ҳақида Илон Маскка айтган деб хабар тарқатилди. Маск эса буни рад этди
