АҚШ президенти Жо Байден General Motors’нинг Детройтдаги электромобиллар ишлаб чиқарувчи заводига ташриф буюрди. Бу ҳақда Reuters агентлигига таяниб, Tengrinews хабар берди.
Президент 1 триллион долларлик инфратузилма тўғрисидаги қонунни қўллаб-қувватлашга йўналтирилган умуммиллий турнеси доирасида Мичиган штатидаги энг йирик шаҳар — Детройтда жойлашган GM заводидаги электромобилни шахсан синовдан ўтказган. Қонунда электромобилларни қувватлантириш бўйича миллий тармоқни яратишга 7,5 миллиард доллар ажратиш кўзда тутилган.
Автозаводга ташрифи давомида Байден АҚШ ҳозирда келажак электромобилларига инвестиция киритиш борасидаги глобал пойгада Хитойдан ўзиб кетиш йўлида турганини маълум қилган.
«XXI асрнинг катта қисмида биз сезиларли даражада етакчилик қилдик, чунки одамларимизга инвестиция киритдик. Биз ўзимизга пул тикдик. Лекин нимадир кутилганидек бўлмади. Шундан буён Хитой ушбу пойгада етакчи бўлиб келаётганди. Бу тез орада ўзгаради, чунки мазкур қонун сабаб кейинги йилда, сўнгги 20 йил ичида биринчи бор Американинг инфратузилмага инвестицияси Хитойникидан сезиларли даражада кўп бўлади», — дейди Байден.
Таъкидланишича, Байден АҚШда сотилаётган электромобилларнинг қарийб 80 фоизи тўғри келадиган Tesla компаниясини эслаб ўтмаган. Шу билан бирга, компания асосчиси Илон Маск Tesla ходимлари касаба уюшмасини тузишига рози бўлмаяпти.
Эслатиб ўтамиз, 2021 йилнинг январида АҚШ президенти Жо Байден Made in America («Америкада ишлаб чиқарилган») тўғрисидаги қарорни имзолаган эди. Ўшанда Байден ўз ташаббуси билан автомобиль секторида миллиондан ортиқ иш ўринларини яратишига ва АҚШни электромобиллар ишлаб чиқаришдаги етакчига айланиши умид қилаётгани маълум қилинганди. Мавзуга доир:
