Samsung компанияси ҳимояланган корпус ва оддий техник тавсифларга эга ҳамёнбоп Galaxy ХCover5 моделини тақдим этди, деб хабар беради Hi-Tech.Mail.ru.
Galaxy ХCover 5 ноқулай об-ҳаво шароитида ишлашга мўлжалланган — у зарблардан, ҳаво ҳароратининг кескин ўзгаришидан, чанг ва намликдан қўрқмайди. Экраннинг анча сезгир ишлаши учун махсус режим ҳам бор бўлиб, уни қўлқопда ҳам бошқариш мумкин.
Замонавий смартфонлардан фарқли ўлароқ, Galaxy ХCover 5’нинг қопқоғи ечилади — уни осонликча очиш ва аккумуляторни алмаштириш мумкин. Ечиладиган аккумулятор ва ҳимоя корпуси олиб ташланса,у жуда ҳам ҳамёнбоп, оддий смартфонга айланади.
Қурилмага HD+ сифатни қўллаб-қувватловчи 5,3 дюймли дисплей ўрнатилган бўлиб, смартфон Exynos 850 процессори, 4 гигабайт тезкор ва 64 гигабайт ички хотирада ишлайди. Аккумулятор сиғими 3000 мА/соат бўлиб, 15 ваттли тезкор қувватланиш функциясига эга.
ХCover 5 биринчи навбатда корпоратив мижозлар учун мўлжалланган, сотувга эса шу йилнинг мартида чиқади. Аввалроқ тарқалган миш-мишларга кўра, смартфон нархи 300 евро атрофда бўлади.
Аввалроқ Samsung компаниясининг юқори ва пастга силжийдиган Galaxy А82 слайдерини сифатли тасвирлари эълон қилинган эди.
