Миясига қон қуйилиши туфайли шифохонага ётқизилган Исроилнинг собиқ президенти Шимон Перес 93 ёшида вафот этди. Бу ҳақда, Reuters агентлигига таяниб, «РБК» хабар бермоқда.
Хабарда маълум қилинишича, Перес Тель-Авивдаги шифохонада, маҳаллий вақт билан соат 3:40 да вафот этган.
Исроилнинг тўққизинчи президенти 13 сентябрь куни инсультни бошдан кечирган эди. Шифокорлар уни сунъий комага ўтказиб, ҳаво айлантириш аппаратига улаб қўйган эди.
Бир муддатдан сўнг Перес сунъий комадан чиқарилгани маълум бўлди. Шифокорлар унинг аҳволи бироз яхшиланганини, лекин ҳалигача оғир бўлиб қолаётганини маълум қилди.
27 сентябрь куни The Jerusalem Post Исроилнинг собиқ президенти оғир аҳволда экани ҳақида хабар берди.
Кейинроқ Переснинг мияси ўлгани қайд қилингани ва унинг қариндошлари у билан видолашишга чақирилгани ҳақида хабар берилган эди.
