Andijon viloyati, Marhamat tumani, “Alitepa” MFY hududidan o‘tuvchi D-140 avtomobil yo‘lining 40-kilometrida 8 yanvar kuni soat 21:35 larda YTH sodir bo‘ldi. Bu haqda viloyat IIB JXX YHXB axborot xizmati xabar berdi.
Ma’lum qilinishicha, haydovchi 1998 yilda tug‘ilgan B.K. Spark avtomobilida katta tezlikda harakatlangan va rul boshqaruvini yo‘qotib, yo‘l chetidagi daraxtga to‘qnashgan.
Hodisa oqibatida vafot yetgan va tan-jarohat olganlar bor.
Holat yuzasidan Marhamat tuman IIB xodimlari tomonidan tergov harakatlari olib borilmoqda.
Avvalroq Andijon viloyatida 2024-yilning 11 oyi mobaynida 630 ta yo‘l-transport hodisasi sodir etilgan bo‘lib, oqibatda 137 nafar fuqaro vafot etgani haqida xabar berilgandi.
Yo‘llarda bolalar o‘limi
Dekabr oyida Xo‘jaobod tumanida Lacetti avtomobilini boshqarib ketayotgan haydovchi qatnov qismining belgilangan joyidan kesib o‘tayotgan 12 yoshli bolani urib yubordi. Iyul oyida esa Andijon shahrida Cobalt haydovchisi 10 yoshli qizchani urib yuborib, jarohatlanishiga sabab bo‘lgandi.
Shuningdek, noyabr oyida Jizzax viloyatining Baxmal tumanida Cobalt katta tezlikda voyaga yetmagan ikki qizni urib yubordi. Shuningdek, Samarqandda avtobus maktab yaqinida yo‘lni kesib o‘tayotgan bolani urib yuborib, uning o‘limiga sabab bo‘lgandi. Surxondaryoda 1-sinf o‘quvchisi Nexia urib yuborishidan vafot etgandi.
Sentyabrda Toshkentda BYD 9 yoshli maktab o‘quvchisini urib yuborib, uning o‘limiga sababchi bo‘lgandi. Xuddi shu kabi holat iyul oyida Navoiy viloyati Xatirchi tumanida sodir bo‘lgan. Katta tezlikda harakatlanayotgan BYD piyodalar o‘tish joyidan o‘tayotgan 9 yoshli qizaloqni bosib ketgan. O‘sha oyda Samarqandda 7 yashar bola avtomobil urib ketishi oqibatida vafot etdi. Aprelda Jizzaxda sodir bo‘lgan YTH oqibatida ikki nafar maktab o‘quvchisi halok bo‘ldi.
Bolalar ishtirokida ayanchli YTHlar ko‘paygach, jamoat faollari yo‘llarda bolalar o‘limi uchun siyosiy javobgarlik bo‘lishi kerakligini aytdi.
Izoh (0)