Falastinning HAMAS guruhi Isroil bilan harbiy harakatlar boshlanganidan buyon o‘z saflariga 10 mingdan 15 minggacha yangi a’zolarni jalb etdi. Bu haqda AQSH kongressidagi ikki manbaga tayanib Reuters xabar bermoqda.
Agentlik suhbatdoshlari o‘z baholashlarida Amerika razvedkasi ma’lumotlariga tayanishgan. U yerda 15 oylik mojaro davomida HAMAS “taxminan shuncha miqdordagi jangarilarni” yo‘qotgani ta’kidlanmoqda. Reuters manbalarining aytishicha, guruhning ko‘plab yangi jangchilari “yosh va tayyorgarliksiz”.
Agentlik ta’kidlashicha, HAMAS haqida aniq ma’lumotlarni to‘plash G‘azodagi tekshiriladigan razvedka ma’lumotlarining yo‘qligi, shuningdek, guruhning yollash va o‘qitish bo‘yicha beqaror sa’y-harakatlari tufayli juda mushkul. AQSH rasmiy ma’lumotlariga ko‘ra, 2023-yil 7-oktyabrga qadar, ya’ni guruh jangarilari Isroilga hujum qilgunga qadar, harakatda 20 mingdan 25 ming nafar kishigacha bo‘lgan.
14-yanvar kuni AQSHning sobiq davlat kotibi Entoni Blinken HAMAS yo‘qotishlarni deyarli qoplaganini ma’lum qilgan. Uning ta’kidlashicha, Vashington Isroil hukumatiga guruhni faqat harbiy kampaniya o‘tkazish orqali mag‘lub etib bo‘lmasligini “allaqachon aytgan”.
Blinkenning bayonotidan so‘ng Isroilning BMTdagi elchisi Denni Danon HAMASning yollash bo‘yicha sa’y-harakatlarini qayd etib, harakatga qo‘shilgan yoshlar “qurol yoki raketa” bilan ta’minlanmaganligi sababli terrorchi bo‘la olmasligini qo‘shimcha qildi.
Isroil va HAMAS o‘rtasida o‘t ochishni to‘xtatish bitimi kuchga kirdi
Izoh (0)