Россия президенти Владимир Путин тинчлик учун Донбасс устидан тўлиқ назорат ўрнатишни талаб қилаётганди. АҚШ президенти Дональд Трамп мазкур талабни қўллаб-қувватлади.
Путиннинг талаблари орасида Донбассни Москва назоратига топшириш ва Россия армияси қисман назорат қилаётган Херсон ва Запорожьедаги фронт чизиғини музлатиш талаби мавжуд. АҚШ президенти иккаласини ҳам ёқлагани айтилмоқда.
Манбага кўра, Россия раҳбари Украинанинг Донецк ва Луганск вилоятларининг ҳали босиб олинмаган қисмларини назарда тутиб, “Украинанинг Донбассни тарк этишини талаб қилмоқда”.
Путин Донбасс ҳудудлари эвазига Харьков ва СумИ вилоятларидаги кичикроқ ҳудудларни Киевга қайтаришга рози бўлган. Аммо бу ерларнинг умумий майдони у талаб қилаётган ҳудудлардан 15 баравар кичик, дейди Reuters агентлиги манбаси.
16 август куни Трамп Украина президенти Владимир Зеленский ва Европа етакчилари билан Аляскада Путин билан бўлиб ўтган музокараларни муҳокама қилди.
Украина президенти Донбассни тарк этишдан бош тортган, деди манба.
Зеленский ҳар қандай ҳудудий ён беришни рад этиб, бу мамлакат конституциясига зид эканини таъкидлаган. Бироқ у Трамп ва Путин билан уч томонлама учрашувда бу масала муҳокама қилинишини истисно қилмаган.
Бундай учрашув 22 август, жума куни бўлиб ўтиши мумкин. Бу санани шанба кунги суҳбат чоғида Трампнинг ўзи европалик ҳамкорларга маълум қилган, деб ёзади CNN.
АҚШ президенти 18 август куни Украина президенти билан музокара олиб боради. У муваффақиятли ўца, учрашувни ташкил этиш бўйича иш бошланади. Учрашувда Европадан камида яна бир етакчи иштирок этиши кутилмоқда. Шунингдек, унда АҚШ вице-президенти Жей Ди Венс ҳам қатнашади.
AFP манбасининг айтишича, агар Кремлнинг Донбассни топшириш бўйича талаблари бажарилса, Россия президенти “Херсон ва Запорожье вилоятларида ҳужумни давом эттирмайди, шунинг учун у ерда ўзига хос музлаш содир бўлади. Аммо де-факто ҳаммаси Путиннинг сўзига боғлиқ бўлади”, дея таъкидлади манба.
Изоҳ (0)