Тошкент шаҳрида йўллларни таъмирлаш ишлари билан боғлиқ харажатларни амалга ошириш учун 12 миллиард сўм ажратилади. Бу ҳақда пойтахт ҳокимининг 14 мартдаги “Тошкент шаҳрида йўлларни таъмирлаш ишлари билан боғлиқ харажатларни амалга ошириш тўғрисида”ги қарорида белгиланди.
Ҳужжатга кўра, ушбу маблағ Тошкент шаҳар ҳокимлиги ҳузуридаги Тошкент шаҳрини ривожлантирш жамғармаси маблағлари ҳисобидан туманлар Ободонлаштириш бошқармаларига ажратилади. Ҳар битта туманга 1 миллиард сўмдан тақсимланади.
Пойтахт ҳокимининг биринчи ўринбосари Бахтиёр Раҳмоновга туманлар ҳокимликлари ҳамда туман Ободонлаштириш бошқармалари билан биргаликда ажаратилган маблағларни ўрнатилган тартибда мақсадли сарфланишини таъминлаш топширилди.
Ажратилган маблағларнинг сарфланиши ва бажарилган иш ҳажми бўйича халқ депутатлари Тошкент шаҳар кенгаши ва Тошкент шаҳар ҳокимлигига ҳисобот киритиб боради. Давлат молиявий назорати инспекцияси Тошкент шаҳар бошқармаси ажратилган маблағларни мақсадли сарфланиши устидан назорат ўрнатади.
Тошкент шаҳрида 7 мартдан кўча-йўл тармоғини таъмирлаш ва реконструкция қилиш бўйича ишлар бошланганди. Таъмирлаш ишлари бошланишидан аввал йўл ҳаракати хавфсизлигини таъминлаш ҳамда шаҳар аҳолиси ва жамоат транспортининг ҳаракатланиши учун қулайликларни ошириш мақсадида пойтахтнинг транспорт оқими фаол бўлган кўчалари ҳолати текширилган.
Таҳлил натижаларига кўра, 2025 йилда жорий ва капитал таъмирлаш талаб қилинадиган кўчалар рўйхатини ўз ичига олган манзилли таъмирлаш дастури ишлаб чиқилди. Дастур доирасида умумий майдони 65 минг квадрат метрдан ортиқ бўлган йўлларни таъмирлаш режалаштирилган.
2025 йил январида Тошкентнинг Яшнобод туманида Кичик ҳалқа автомобиль йўлининг Махтумқули кўчасига туташган қисмини қайта қуриш ишлари ниҳоясига етказилганди. Ишлар доирасида 5700 метр квадрат йўл қопламаси ётқизилди. Шунингдек, 800 метр сув чиқариш лотоклари ўрнатилди. Шу билан бирга, 1825 метрга бордюр тоши қўйилди.
Изоҳ (0)