Статистика агентлиги Ўзбекистоннинг 2024 йилнинг 6 ойи давомида амалга оширган экспорт ва импорт операциялари бўйича маълумот берди.
Ўзбекистон 2024 йилнинг январь–июнь ойларида 1 миллион тонна мева-сабзавот экспорт қилди. Мазкур кўрсатгич 2023 йилнинг мос давридагига нисбатан 45,3 минг тоннага (4,7 фоиз) кўп. Экспорт қилинган маҳсулотлар қиймати эса 607,3 миллион долларга етди. Бу 2023 йилнинг мос давридагидан 8 фоизга ортиқ.
Мева-сабзавот маҳсулотларининг асосий экспорт бозорлари Россия (41,2 фоиз), Қозоғистон (16,8 фоиз), Покистон (15,3 фоиз) ҳамда Хитой (5,9 фоиз) давлатлари ҳиссасига тўғри келган.
Ўзбекистон ярим йил давомида Россияга умумий қиймати 250,1 миллион долларлик 348,4 минг тонна мева-сабзавот экспортини амалга оширди. Қозоғистонга 101,7 миллион долларлик 335,8 минг тонна, Покистонга 92,7 миллион долларлик 89 минг тонна, Хитойга 35,8 миллион долларлик 44,3 минг тонна мева ва сабзавот маҳсулотлари сотилди.
Масалан, биринчи ярим йилликда 71,7 миллион доллар эвазига 33,5 минг тонна гилос ва олча, 47 миллион долларга 46 минг тонна ўрик мевалари экспорт қилинган.
Экспорт таркибида сабзавотлардан 267,4 минг тонна пиёз 53,3 миллион долларга, 159,5 минг тонна карам 41,6 миллион долларга, 93,6 минг тонна сабзи 23,2 миллион долларга сотилган. Узум экспорти 6 минг тонна бўлиб, 5,5 миллион долларни ташкил этган.
2022–2023 йиллардаги кўрсаткичлар
Ўзбекистон 2022 йил январь–июль ойларида жами қиймати 549,2 миллион долларлик 968,5 минг тоннадан зиёд мева–сабзавот экспорт қилган. Ўтган 2023 йилнинг январь–июль ойларида эса 672,9 миллион долларлик мева–сабзавот экспорти амалга оширилган. Бу кўрсаткич 2022 йилнинг мос даврига нисбатан 22,4 фоизга юқори бўлиб, жами экспортдаги улуш 4,5 фоизни ташкил этган.
Ўтган йилда ҳам мамлакатнинг мазкур маҳсулотлар савдосида асосий экспорт бозорлари Россия (41,8 фоиз), Покистон (14,6 фоиз), Қозоғистон (12 фоиз) ҳамда Қирғизистон (9,1 фоиз) мамлакатлари бўлган.
2023 йил январь–июль ойларида мева ва сабзавотлар экспортининг қиймат жиҳатидан энг катта ҳажми Россияга тўғри келган (41,8 фоизи). Бу кўрсаткич Покистонга экспорт ҳажмидан 2,9 баробар кўпдир.
Ўтган йилнинг дастлабки 6 ойида шафтоли бошқа меваларга қараганда кўпроқ маблағ келтирган. Ярим йил давомида 54,5 миллион долларлик 67,6 минг тонна шафтоли экспорт қилинган. Шу билан бирга, 52,9 миллион долларлик гилос (45 минг тонна), 40,7 миллион долларлик ўрик (63,1 минг тонна), 22,3 миллион долларлик (30,1 минг тонна) узум экспорт қилинган.
Сабзавотлардан 51,9 миллион долларлик пиёз (254,7 минг тонна), 33,4 миллион долларлик (43,2 минг тонна) помидор, 21,1 миллион долларлик (78,2 мин тонна) карам экспорт қилинган.
Экспортдаги умумий кўрсаткичлар
Ўзбекистон жорий йил январь–июнь ойларида салкам 13 миллиард долларлик товар ва хизматлар экспортини амалга оширди. Республика жаҳоннинг 186 мамлакати билан савдо алоқаларини амалга ошириб келмоқда.
Мамлакат билан Хитой (18,5 фоиз), Россия (18,1 фоиз), Қозоғистон (6 фоиз), Туркия (4,5 фоиз) ва Корея (3,4 фоиз) давлатлари савдо ҳажми бошқаларга қараганда сезиларли кўп. Масалан, Ўзбекистон Хитойга 2022 йилнинг январь–июнь ойларида 1,2 миллиард долларлик, 2023 йилнинг мос даврида 1 миллиард долларлик, 2024 йилнинг мос даврида 994,7 миллион долларлик маҳсулотлар экспорт қилган.
Россияга 2022 йилнинг дастлабки 6 ойида 1,2 миллиард долларлик, 2023 йилнинг 1-ярим йилида 1,3 миллиард долларлик, 2024 йилнинг январь–июнь ойларида 1,7 миллиард долларлик товар ва хизматлар экспорти амалга оширилган.
Статистика агентлиги маълумотига кўра, бугунги кунда Ўзбекистон экспортёрлари сони 5 682 тага етган. Улар томонидан ўтган ярим йилда қарийб 8,7 миллиард долларлик (номонетар олтиндан ташқари) товар ва хизматлар экспорт қилинган. Мазкур қиймат 2023 йилнинг мос даврига нисбатан 10,9 фоизга кўп.
Изоҳ (0)