Украина иттифоқчилар кўмагида урушнинг қизғин босқичини 2024 йил охиригача якунлаши мумкин. Режа яқин орада тайёр бўлади. Бу ҳақда Украина президенти Владимир Зеленский BBC’га берган интервьюсида маълум қилди.
“Ўйлайманки, агар биз бирлашсак, масалан, Тинчлик саммити формати бўйича борсак, урушнинг қайноқ босқичини тугатишимиз, буни йил охиригача амалга оширишга уриниб кўришимиз мумкин”, деди сиёсатчи.
Зеленский “режа тайёр бўлади” деб ишонтирди, агар Украина урушнинг қайноқ босқичини якунлашга муваффақ бўлса, бу тўғри ва кучли қарор бўлишига тўхталди.
“Мазкур режа ҳамкорлар билан бирлашиши керак, бу уларнинг хоҳишига боғлиқ бўлади. Шунда ҳеч ким ўзининг урушни тугатиш бўйича ташаббуслари билан ўйнашмайди. Бу кейинчалик Россияга босим ўтказадиган ҳамкорларга ҳам боғлиқ. Россия ‘ўтириб урушни тугатиш ҳақида ўйлашга’ рози бўлиши учун”, дейди Украина президенти.
У уруш ҳарбий йўл билан эмас, дипломатик йўл билан якунланишини таъкидлади.
“Бу барча ҳудудлар куч билан қайтарилади, дегани эмас. Ўйлайманки, дипломатия кучи ёрдам бериши мумкин”, деди у.
Унинг сўзларига кўра, Россиянинг жанг майдонидаги заифлиги музокаралар столида Украинанинг кучига айланмоқда.
“Россияга босим ўтказиб, дипломатик келишувга эришиш мумкин деб ҳисоблайман”, дея хулоса қилди Зеленский.
Эслатиб ўтамиз, 15—16 июнь кунлари Швейцарияда 100 та давлат ва халқаро ташкилотлар иштирокида биринчи Тинчлик саммити бўлиб ўтди.
Унинг якунлари бўйича президент Владимир Зеленский иккинчи Тинчлик саммити “йиллар эмас, ойлар ичида бўлиб ўтиши” ва унда Россия вакиллари иштирок этишини айтди. Украина раҳбарининг фикрича, тадбир БАА ёки Саудия Арабистонида ўтказилиши мумкин.
Кремлнинг таъкидлашича, Россия “Украина келишуви” бўйича мулоқотга тайёр, аммо Москва иккинчи Тинчлик саммитида нима муҳокама қилинишини тушуниши лозим.
Изоҳ (0)