Ўзбекистонда январь ойидаги экспорт ҳажми ўтган йилдаги кўрсаткичдан 47,1 фоизга пасайди

Ўзбекистонда 2024 йилнинг январь ойида ташқи савдо айланмаси 4,2 миллиард долларга етди. Бу ҳақда Статистика агентлиги хабар берди. 

Қайд этилишича, ташқи савдо айланмаси (ТSA) ҳажми 2023 йилнинг мос даври билан солиштирилганда 870,1 миллион долларга ёки 17,2 фоизга камайган. Ўзбекистон 2024 йилнинг январь ойида жаҳоннинг 137 та мамлакати билан савдо алоқаларини амалга оширган.

ТSAнинг нисбатан салмоқли ҳиссаси Хитой (27,2 фоиз), Россия (18,3 фоиз), Қозоғистон (6,5 фоиз), Туркия (5,1 фоиз) ва Жанубий Кореяда (4,3 фоиз) қайд этилган.

Ўтган ойда экспорт 1,1 миллиард долларга (-47,1 фоиз) етган бўлса, импорт 3,1 миллиард долларни (+4,1 фоиз) ташкил этган. Салбий салдо — 1,9 миллиард доллар.

Январь ойида президент мамлакатдаги экспорт ҳолатини танқид қилганди

Шавкат Мирзиёев раислигида январь ўрталарида экспорт, инвестиция ва маҳаллий саноатда 2024 йилда турган вазифалар бўйича йиғилиш ўтказилганди. Ўшанда президент бевосита инвестиция, саноат ва экспортга масъул 11 та вазирлик ва идора, 10 та уюшма, хориждаги дипломатик ваколатхоналар, бундан ташқари, барча вазирлик, тармоқ ва ҳудудларда экспорт ва инвестицияга масъул раҳбар ўринбосари фаолият юритаётган инвестициялар ва ташқи савдо тизимининг фаолияти жуда сустлигини кўрсатиб ўтган эди.

Шунингдек, йиғилишда ҳозирги мураккаб вазиятда тизимда инвестиция ва экспорт бўйича чуқур таҳлил йўқлиги танқид қилинганди. Мамлакатда экспортни кредитлашга 200 миллион доллар ресурс берилган, бундан ташқари, бу йил экспортчиларни қўллаб-қувватлашга 800 миллиард сўм йўналтирилмоқда. Президент Экспорт агентлиги экспортчиларга ҳақиқий кўмакчи бўлиш ўрнига давлатдан берилган тайёр пулни йўналтирадиган “бухгалтер-кассир”га айланиб қолганини танқид қилинган эди.

Ундан олдинроқ эса давлат раҳбари иқтисодий комплексдаги ўринбосарлар сонини 15 фоизга қисқартириш бўйича таклиф киритишга топшириқ берганди. Бунда ҳар бир туманда, вилоятдаги иқтисодий комплекснинг раҳбар ва ўринбосарлари ҳамда 11 та вазир ва идора раҳбарлари ҳамда уларнинг ўринбосарларига масъулияти ва жавобгарлиги аниқ белгилаб берилади. Сўров ҳам шунга яраша қаттиқ бўлади.