Ўзбекистон ФИФА Forward дастурини татбиқ этиш бўйича Марказий Осиёда етакчилик қилмоқда

FIFA Forward дастурини ҳаётга татбиқ этиш бўйича ФИФАга аъзо мамлакатларнинг натижалари эътироф этилди.

Мазкур дастур кўмагида Ўзбекистонда сўнгги йилларда футболнинг оммавийлигини янада ошириш, истиқболли ва иқтидорли футболчиларни танлаш ҳамда профессионал даражада тайёрлаш, турли ёш тоифасидаги миллий терма жамоаларни ривожлантириш дастури жадал олиб борилмоқда.

ФИФА ёшларимизнинг U-20 ва U-23 Осиё Кубоги, ФИФА U-17, ФИФА U-20 Жаҳон чемпионатидаги муваффақиятли иштирокини қайд этиб ўтди. Бу — ўзбек футболини ривожлантиришнинг улкан стратегиясидан дарак бермоқда. Ўз ўрнида мамлакатда “Мактабда футбол” ва FIFA Forward ривожланиш дастури фаол татбиқ этилган, дейилади ташкилот хабарида.

Қайд этилишича, 2016-2023 йиллар давомида FIFA Forward дастурининг молиявий кўмаги асосида бир нечта лойиҳалар амалга оширилди. Ўзбекистон футбол ассоциацияси томонидан миллий терма жамоалар учун база ташкил этиш лойиҳасини молиялаштириш учун ФИФАга ариза топширилган. Тошкент вилоятида жойлашган Миллий терма жамоалар маркази лойиҳаси — мамлакат футболининг келажакдаги муваффақиятлари учун калит бўлиб хизмат қилади.

Лойиҳа доирасида халқаро стандартларга жавоб берадиган машғулот майдонларини (2 гибрид ва 2 сунъий майдон) яратиш, эркаклар ва аёллар терма жамоаларининг йиғинларини ўтказиш учун Миллий марказини реконструкция қилиш, шу жумладан, хизмат кўрсатиш соҳасини яхшилаш, инфратузилмани оптималлаштириш мақсад қилинган.

Миллий марказни халқаро стандартлар асосида ташкил этиш жараёни қуйидагича давом этмоқда:

• 1-босқич – Дренаж, суғориш тизими ва тўртта майдон қуриш
• 2-босқич – Стадион биноси ва трибуналарини реконструкция қилиш
• 3-босқич – асосий стадион учун прожекторлар ўрнатиш
• 4-босқич – Ўзбекистон жамоалари учун меҳмонхона бунёд этиш.

ФИФАнинг Осиё ва Океания бўйича минтақавий директори Санживан Баласингам бу борада ўз фикрларини билдириб ўтди:

“Ўзбекистон Марказий Осиёда футболни ривожлантириш борасида етакчилик қилмоқда, FIFA Forward томонидан мамлакат инфратузилмасига сармоялар киритмоқда. Мамлакат кўплаб футбол ассоциациялари билан тажриба ва билим алмашиш юзасидан семинарлар ташкил этмоқда. Йирик турнирлар, халқаро мусобақаларга мезбонлик қилишда намуна бўлмоқда. Бу саъй-ҳаракатлар албатта Ўзбекистон терма жамоаларининг ўйинларида ҳам ижобий акс этаётгани қувонарли”, — дея таъкидлади Санживан Баласингам.