Тошкент шаҳар ИИББ Чилонзор туманида йўл ҳаракати қатнашчиларининг ҳаётини хавф остига қўйиб, пранк олган йигитлар бўйича маълумот берди.
Ижтимоий тармоқларда номаълум фуқаро Чилонзор туманида жамиятда юриш-туриш қоидаларини бузгани акс этган видео тарқалиб, турли муҳокамаларга сабаб бўлмоқда.
Идоранинг қайд этишича, 31 май куни Чилонзор тумани “Чилонзор” метро бекати олдидаги йўл қатнов қисмининг пиёдалар ўтиш жойида 19 ёшли П.Д. ва ушбу пранкни тасвирга олишга жалб қилинган таниши 23 ёшли Т.М. жамиятда юриш-туриш қоидаларини қасддан менсимасдан, гўёки ўзини оёғи синган ҳолатда кўрсатиб, йўл қатнов қисмида сунъий тирбандлик содир этган ҳамда йўл ҳаракати қатнашчиларининг ҳаётини хавф остига қўйган.
Мазкур ҳолат юзасидан Чилонзор тумани ИИО ФМБ томонидан ушбу фуқароларга нисбатан Маъмурий жавобгарлик тўғрисидаги кодекснинг 183-моддаси (майда безорилик) билан маъмурий баённома расмийлаштирилиб, қонуний чора кўриш учун ҳужжатлар Жиноят ишлари бўйича Чилонзор туман судига юборилган.
Суднинг 2 июндаги қарорига кўра фуқаролар Т.М. ва П.Д. Маъмурий жавобгарлик тўғрисидаги кодекснинг 183-моддаси (Майда безорилик) да назарда тутилган ҳуқуқбузарликни содир қилган деб топилиб, ушбу кодекснинг 32-моддаси (Маъмурий жавобгарликни оғирлаштирувчи ҳолатлар) 4-қисми тартибида уларнинг ҳар бирига уч сутка маъмурий қамоқ жазоси тайинланди.
Бир неча кун олдин Тошкент шаҳрида метро ичида икки йигит нотаниш қизга шилқимлик қилиб, ҳолатни видеога олгани тўғрисида хабар берилганди. Жиноят ишлари бўйича Чилонзор туман судининг 1 июндаги қарорига кўра улар Маъмурий жавобгарлик тўғрисидаги кодекснинг 41-1-моддаси (шаҳвоний шилқимлик қилиш) 1-қисмида назарда тутилган ҳуқуқбузарликни содир қилган деб топилиб, ушбу кодекснинг 32-моддаси (маъмурий жавобгарликни оғирлаштирувчи ҳолатлар) 4-қисми тартибида уларнинг ҳар бирига 5 сутка маъмурий қамоқ жазоси тайинланган.
Изоҳ (0)