Филиппинда йўловчи паромда ёнғин чиқиши оқибатида 31 киши ҳалок бўлди. Бу ҳақда ABS-CBN телеканали Басилан провинцияси губернатори Жим Ҳатаман-Суллиманга таяниб маълум қилди.
Қайд этилишича, Lady Mary Joy 3 кемаси Балук-Балук ороли яқинида ёниб кетган пайтда унда 250 га яқин йўловчи ва экипаж аъзолари бўлган.
Дастлаб 12 киши ҳалок бўлгани ҳақида хабар берилганди, бироқ кеманинг бир қисмида яна 18 кишининг жасади топилган, улардан олти нафари бола. Яна бир жасад Изабел шаҳри яқинида сувдан топилган.
Айни пайтда етти киши бедарак йўқолган. Провинция раҳбарининг сўзларига кўра, уларнинг сони ортиши мумкин, чунки кемадаги йўловчиларнинг аниқ сони ҳозирча маълум эмас.
Расмий маълумотларга кўра, 230 га яқин одам қутқарилган, улардан 23 нафари шифохонага етказилган.
Паромдаги ёнғин сабаблари ўрганилмоқда.
Изоҳ (0)