Тошкентда футбол ўйнагани келган йигитлар ўртасида оммавий жанжал содир бўлгани юзасидан маълумот берилди
Тошкент шаҳар ИИББ ижтимоий тармоқларда турли муҳокамаларга сабаб бўлаётган, бир нечта фуқаро ўзаро жанжаллашгани акс этган видео юзасидан маълумот берди.
Аниқланишича, 26 март куни тахминан соат 22:30 ларда Янгиҳаёт тумани Янгиҳаёт 10-ҳудуддаги мини футбол стадионида, футбол ўйнаш учун келган вояга етмаган болалар футбол майдонини талашиб, ўзаро оғзаки жанжаллашган. Жанжални кўрган ота-оналар фарзандларини чақириб, уйига олиб кириб кетган. Оғзаки жанжал натижасида фуқаролар тан жароҳати олмаган.
Идора матбуот хизматининг қайд этишича, мазкур ҳолат юзасидан Янгиҳаёт тумани ИИО ФМБ томонидан текширув ўтказилмоқда. Текширув якуни бўйича қонуний қарор қабул қилиниши таъминланади.
“Ҳурматли ота-оналар, фарзандларингизга ҳар қандай муаммони ўзаро келишув йўли билан ҳал қилиш мумкинлигини, жанжал-тўполон билан бирор натижага эришиб бўлмаслигини, содир этилган ҳуқуқбузарлик учун қонунда жазо чоралари белгиланганини тушунтиришингизни сўраймиз”, — дейилади муносабатда.
Аввалроқ Тошкентда ўқувчилар футболдаги жанжал сабаб муштлашиб кетгани тўғрисида хабар берилганди.
