Тошкентдаги “Ипподромда” 2 бош от очликдан нобуд бўлди 

Ижтимоий тармоқларда “Тошкент отчопари” акциядорлик жамиятига тегишли отхонада ҳайвонлар очликдан ўлаётгани ҳақида хабарлар тарқалди. Ветеринария ва чорвачиликни ривожлантириш қўмитаси ҳолатга муносабат билдирди.

Қайд этилишича, ўрганишлар давомида мазкур отхона ветеринария санитария кўригидан ўтказилган. Маълум бўлишича, “Тошкент отчопари” отхонасининг воқеа содир бўлган учта бўлмаси фуқаро Қ.С.га ижарага берилган ва у бу ерда 14 бош от сақлаган.

Отларга ёлланма ветеринария хизмати кўрсатилмаган. Етарли ва зарурий озуқа жамғарилмаган. Нотўғри озиқлантириш оқибатида 2 бош оти нобуд бўлган, қолганлари ўта озғин ҳолатга келиб қолган.

Ҳозирда “Тошкент отчопари” акциядорлик жамиятида Ички ишлар вазирлигининг 60 бош, Миллий гвардиянинг 18 бош, фуқароларга тегишли 72 бош, жами 150 бош от сақланади. Мазкур отлар ветеринария хизмати томонидан куйдирги касаллигига қарши эмланган. Бруцеллёз касаллигига қон намуналари, гелминтларга қарши ахлат намунаси олиниб, диагностик текшириш учун Республика ҳайвонлар касалликлари ташхиси ва озиқ-овқат маҳсулотлари хавфсизлиги давлат марказига топширилган ва диагностик текширувдан ўтказилган.

Текширувлар натижасида отларда юқумли ва хавфли касалликлар аниқланмаган.