Қибрайда йигит укаси ва ИИБ ходимларини пичоқламоқчи бўлди (видео)
Тошкент вилояти Қибрай туманида 20 ёшли йигит укаси ва ИИБ ходимларига пичоқ билан таҳдид қилди. Вилоят Ички ишлар бош бошқармаси ахборот хизмати ҳолат юзасидан муносабат билдирди.
Маълум бўлишича, 26 январь куни соат 20:00 да “Янгиҳаёт” маҳалласида яшовчи фуқаро шу ҳудудда жойлашган ИИБ ҳуқуқ-тартибот масканига бориб, хонадонида жанжал бўлаётганини айтиб, ёрдам сўраган.
Хабарга асосан, 2 нафар профилактика инспектори фуқаро билан бирга унинг уйига етиб борган. Хонадонда инспекторлар 19 ва 20 ёшлардаги йигитлар уришиб, бир-бирига пичоқ билан таҳдид қилаётганига гувоҳ бўлган. Ажратмоқчи бўлганида, улардан бири инспекторларга ҳам қўлидаги пичоқ билан таҳдид қилгани атрофдаги кузатув камерасига тушиб қолган.
Профилактика инспекторлари ушбу шахсларни хавфсизлантиргач, ҳудудий ҳуқуқ-тартибот масканига олиб келган. Ҳолат юзасидан ҳужжатларни расмийлаштириш вақтида фуқаро яна жанжални давом эттириб, инспекторнинг хизмат хонасида бўлган қайчини қўлига олган ва ходимларга ўқталиб, енгил тан жароҳати етказган.
У ҳаракатларини давом эттиргач, ходимлар хавфсизликни таъминлаш мақсадида қўлидаги тиғли жисми олиб, унга кишан тақиб қўйган. Орадан бир оз вақт ўтгач, ушбу фуқарода тутқаноқ касаллиги қўзғаб, ўзини ноодатий тута бошлаган. Айни шу вақтда унинг оила аъзолари қидириб, ҳуқуқ-тартибот масканига кириб келган.
ИИBBнинг қўшимча қилишича, улар воқеани видеога олиб, гўёки ИИБ ходимлари фуқарони калтаклаб, шу кўйга солди мазмунида изоҳлаган. Лекин мазкур жараёнда ходимлар томонидан фуқароларга нисбатан куч ишлатилмаган. Ҳозирда ҳолат юзасидан қонунийликни таъминлаш мақсадида туман прокуратураси томонидан терговга қадар текширув ҳаракатлари олиб борилмоқда.
