Париж Киевга қирувчилар етказиб беришни истисно қилмайди, аммо бу ҳаракат урушнинг кучайишига олиб келмаслиги, шунингдек, Европа хусусан, Франциянинг хавфсизлигига зарар етказмаслиги шарт. Бу ҳақда 26 январь кунги матбуот анжуманида Франция Миллий ассамблеясининг Миллий мудофаа ва Қуролли кучлар қўмитаси раҳбари Томас Гасиллуд маълум қилди.
“Ҳар бир аниқ вазият бўйича сўровларни кўриб чиқишимиз ва барча эшикларни очиқ қолдиришимиз керак. Буёғига нима бўлишини яқин ҳафталарда кўрамиз, чунки ишлар тез суръатда давом этмоқда”, — дея тушунтирди франциялик амалдор.
Шунингдек, у Франция Украинага ўзининг Leclerc танкларини етказиб бериши даргумонлигини таъкидлади, чунки улар Киевга берилиши эълон қилинган Америка ва Германия танклари билан “мос тушмайди”.
“Украиналиклар учун ҳар хил турдаги танклар билан шуғулланиш қиммат ва қийин бўлади. Биз, масалан, ер-ҳаво имкониятлари ҳақида ўйлаяпмиз”, — деб тушунтирди Гасиллуд.
Эслатиб ўтамиз, Франция мудофаа вазири Себастьян Лекорну февраль ойида Франция Украинага биринчи АМХ10-РC ғилдиракли енгил танкларини етказиб беришни режалаштираётгани ҳақида маълум қилганди.
25 январь куни АҚШ ҳукумати Киевга 31 та М1 Abrams оғир танкларини топширишини маълум қилди. Ўз навбатида, Германия ҳукумати ҳам Украинага Германия қуролли кучлари захирасидан 14 та Леопард 2 танкини жўнатиши ва бошқа давлатларга реекспорт учун рухсат беришини тасдиқлади. Шу куни Норвегия ва Словакия Мудофаа вазирлиги ҳам танкларни Украинага ўтказиш нияти борлигини маълум қилди. Аввалроқ Киевни танклар билан таъминлаш қарори Буюк Британия, Франция ва Польша расмийлари томонидан эълон қилинганди.
Ғарб давлатлари Киевга танклар етказиб берилиши ҳақида эълон қилгач, Украина президенти Владимир Зеленский мамлакат улардан узоқ масофага учувчи ракеталар ва жанговар самолётлар олишни ҳам кутаётганини айтди. Politico нашри хабар беришича, Ғарб ҳарбий амалдорлари Украинага қирувчи самолётлар етказиб бериш масаласини муҳокама қилмоқда.
Изоҳ (0)