Европа Иттифоқи (ЕИ) кенгаши Украина ва Грузиянинг босиб олинган ҳудудларида берилган Россия парпорталарини тан олмасликка қарор қилди. Бу ҳақда ЕИ кенгаши хабарида маълум қилинди.
«Ушбу қарор Россиянинг Украинага қарши асоссиз ҳарбий тажовузи ва босиб олинган ҳудудлар аҳолисига Россия хорижий паспортларини бериш амалиётига жавобдир. Бу, шунингдек, Россиянинг 2008 йилда Грузиянинг Абхазия ва Жанубий Осетия ҳудудлари мустақиллигини тан олиш ҳақидаги бир томонлама қарорига ҳам алоқадор», дейилади хабарда.
Таъкидланишича, Украинанинг Россия томонидан босиб олинган ҳудудларида ёки Грузия ҳудудларида яшовчи шахсларга берилган Россия саёҳат ҳужжатлари виза олиш ёки Шенген ҳудуди чегараларини кесиб ўтишда тан олинмайди.
«Ушбу ҳудудларда берилган паспортлар Европа Иттифоқига аъзо давлатлар томонидан тан олинмаяпти. Мазкур қарор умумий ёндашувни ишлаб чиқиш, ташқи чегара ва умумий виза сиёсатининг тўғри ишлашини ҳамда Европа Иттифоқига аъзо давлатларнинг хавфсизлигини таъминлашга қаратилган», дейилган хабарда.
ЕИнинг эслатишича, Қрим ярим ороли 2014 йилнинг март ойида ноқонуний равишда аннексия қилинганидан бери Россия аҳолига ўзининг паспортларини бериб келмоқда. 2019 йил апрелида бу амалиёт Донецк ва Луганск вилоятларининг Украина назорати остида бўлмаган қисмларига, кейинроқ, 2022 йил июлида эса Херсон ва Запорожье вилоятларининг босиб олинган ҳудудларига татбиқ этилган.
Европа Иттифоқи Кенгашида қайд этилганидек, ушбу ҳудудларда Россия паспортларининг мунтазам равишда берилиши халқаро ҳуқуқ ва Украина ҳудудий яхлитлиги, суверенитети ва мустақиллигининг навбатдаги бузилиши ҳисобланади.
«Кенгашнинг бугунги қарори Украина томонида эканимизнинг яна бир далилидир. Унинг ҳудудлари Россия томонидан ноқонуний аннексия қилинишини ҳеч қачон тан олмаймиз ва Украинанинг барча босиб олинган ҳудудларни озод қилиш ва улар устидан тўлиқ назоратни тиклаш ҳуқуқини яна бир бор тасдиқлаймиз», — дея изоҳ берди Чехия ички ишлар вазири, Европа Иттифоқига раислик қилувчи Вит Ракушан.
Изоҳ (0)