Андижонда автобус ва юк машинаси тўқнашувидан уч киши ҳалок бўлгани юзасидан жиноят иши қўзғатилди

Андижонда Isuzu ва юк машинаси тўқнашиши оқибатида 41 киши жароҳатланиб, 3 нафари воқеа жойида ҳалок бўлганди. Йўл ҳаракати хавфсизлиги хизмати ҳолат юзасидан жиноят иши қўзғатилганини маълум қилди.

Қайд этилишича, Андижон вилояти ҳудудидан ўтувчи халқаро аҳамиятга молик А373 «М39 автойўли-Гулистон-Бўка-Ангрен-Қўқон ва Андижон орқали-Ўш» автомобиль йўлининг 388-389 километрлари оралиғида қайта таъмирлаш ишлари олиб борилаётгани сабабли 2022 йилнинг 18 ноябридан буён йўлнинг бир томонида 1100 метр масофада таъмирлаш ишлари «Резина Optima Стандарт» МЧЖ томонидан «Автомобиль йўллари тўғрисидаги» қонун ҳамда Вазирлар Маҳкамасининг 2011 йил 26 декабрдаги 342-сонли қарорининг 1-иловаси 13,14,15,16,18-бандларига зид равишда Давлат йўл ҳаракати хавфсизлиги хизмати органлари билан келишилмасдан олиб борилаётгани сабабли транспорт воситаларининг ҳаракати қарама қарши томонидан ташкил этилган.

Юқоридаги қарор талаблари «Резина Optima Стандарт» МЧЖ томонидан бажарилмагани сабабли 26 ноябрь куни соат 08:40 ларда Андижон вилояти ҳудудидан ўтган А 373 автомобиль йўлининг 388-389 километрлари оралиғида Isuzu автобусида бир томонлама ташкил этилган йўлда ҳаракатланаётиб, қуюқ туман тушгани ва кўриниш масофаси чеклангани учун Howo юк машинаси билан тўқнашган.

Ҳодиса натижасида 3 нафар автобус йўловчиси вафот этган, жами 31 нафар фуқаролар жумладан юк автомобили ҳайдовчиси ҳам турли даражадаги тан жароҳатлари билан шифохонага ётқизилган.

Мазкур ЙТҲ юзасидан Андижон вилояти ИИБ ҳузуридаги ТБ томонидан Жиноят кодексининг 266-моддаси 3-қисми «а» банди билан жиноят иши қўзғатилиб, тергов ҳаракатлари олиб борилмоқда.