Тошкент шаҳри Чилонзор туманида катта дарахтларнинг илдизига шикаст етказилгани ҳақида хабар берилганди. Туман ҳокимлиги ҳолат юзасидан муносабат билдирди.
Чилонзор тумани ҳокимлиги тегишли масъулларининг маълумотларига кўра, бугунги кунда туман ҳудудида кенг кўламли ободонлаштириш ва бунёдкорлик ишлари олиб борилмоқда. Аҳоли дам оладиган жойлар, аллеялар, сайилгоҳлар қурилиши ишлари давом этмоқда.
Шу ўринда, қурилиш ишлари кетаётган айрим ҳудудларда қурилиш ташкилоти томонидан дарахтларга эътиборсизлик қилинган ҳолатлар ҳам бўлган. Ҳозирда туманда қурилиш кетаётган ҳудудлардаги дарахтларнинг ҳолати ўрганилиб, туман экология ва атроф-муҳитни ҳимоя қилиш бўлими масъуллари томонидан назоратга олинган.
Бу борада аҳолининг жамоатчилик назоратига ҳам эътибор қаратилиб, келиб тушган мурожаатлар тезда ўрганилмоқда ва зарурий чоралар кўрилмоқда.
Ижтимоий тармоқларда тарқалган суратларга кўра, воқеа жойига бош прокурор, Экология қўмитаси раиси, Тошкент шаҳри ҳокими ва Президент администрацияси вакиллари етиб борган.
Изоҳ (0)