Бугун,

  • USD 10920.28
  • RUB 177.49
  • EUR 11052.42

Андижон вилоятида бир ой давомида эрталаб ва кечқурун бир соатдан пиёда юрган маҳалла аҳолиси Самарқанд ва Бухорога, уч ой давомида шу ишларни ташкил этган маҳалла раислари ва ходимларини юришга мажбурлаган ташкилот раҳбарлари эса Дубайга саёҳатга юборилади. Бу ҳақда Андижон вилояти ҳокими Шуҳрат Абдураҳмонов халқ депутатлари вилоят кенгашининг 30-сессиясида маълум қилди, дея хабар бермоқда «Дарё» мухбири.

Фото: «Дарё»

Шуҳрат Абдураҳмонов вилоятда соғлом турмуш тарзини кенг тарғиб қилиш, аҳолини оммавий спортга кенг жалб этиш, спорт билан шуғулланиш учун қулай шарт-шароитлар яратиш, спорт инфратузилмасини ривожлантиришга алоҳида эътибор қаратилаётганини билдириб, 14 декабрдан—14 январга қадар вилоятда «Саломатлик ойлиги» ўтказилаётганини таъкидлаган.

Андижонда аҳолини овқатланиш ва соғлом турмуш тарзига ўргатиш мақсадида янги тажриба йўлга қўйилганини айтиб, ҳар куни эрталаб ва кечқурунда бир соатдан пиёда юрганларни саёҳатларга юборишини маълум қилган.

«Битта маҳаллада беш юзта хонадондан ҳеч бўлмаса биттадан чиқиб бир ой эрталаб ва кечқурун бир соатдан пиёда юрса, ўша маҳалладагиларни барчасини Самарқанд ва Бухорога саёҳатга юбораман. Агарда маҳалла раиси, профилактика инспектори ва уларнинг атрофидагилар уч ой давомида хонадонлардаги фуқароларни пиёда юришга жалб этишни ташкиллаштириб берса, уларни Дубайга юбораман.

Бундан ташқари, узлуксиз равишда эрталаб ва кечқурун ходимлари билан бирга пиёда юришни ташкил қилган ташкилот раҳбарларини ҳам Дубайга жўнатвораман. Қанча пул кетса ҳам майли. Мақсад одамларни юргазиш. Бундан ортиқ бошқа нима қилиш керак?», — дейди Шуҳрат Абдураҳмонов.

Вилоят ҳокими аҳолининг касал бўлишини олдини олиш мақсадида ўз саломатлиги ёки ваъда қилинаётган мукофот учун пиёда юришни истамаганларни мажбурлаб бўлса-да, юришини йўлга қўйишини айтган.

«Эндокрин, юрак қон-томир ва бошқа касалликларнинг келиб чиқиши иккита нарсага — камҳаракатлик ва нотўғри овқатланишга боғлиқ. Камҳаракатлик бўйича қайга борсам гапираяпман. Олдинлари битта каналдан иккинчи каналга олиш учун телевизор олдига борардик. Ҳозир ётган еримизда ҳамма нарсани бошқаряпмиз. Кўчага чиқиб қўлингизни чўнтагингизга солиб чиқариб қўйсангиз машина тўхтаяпти. Бир қадам юрмаяпти. Мен буларни гапиришга мажбурман.

Президентимизга «Андижонликлар ҳаммамиз юрамиз», деб ваъда берганман. Яна бир бор айтаман, авваламбор, ўзингнинг саломатлигинг учун юр, унинг учун юрмасанг, берадиган рағбатим, мукофот учун юр. Унда ҳам бўлмаса, уйингга бориб, мажбурлаб, етаклаб олиб чиқишга мажбур бўламан. Бўлмаса бошқа иложимиз йўқ. Эртага касал бўлгандан кейин миллион-миллион сарфлагандан кўра, касал бўлишнинг олдини олиб қўяйлик. Шунга миллион сарфлаб қўя қолайлик, деган ҳисоб-китоб билан гапиряпман. Ёқадими-ёқмайдими, қаттиқ-қаттиқ гапиришга мажбурман. Келинглар, ҳаммамиз бир бўлиб, шунга ҳаракат қилайлик. Эрталаб ва кечқурунда бир соатдан пиёда юрайлик, овқатланишни тартибга солайлик», — дейди Шуҳрат Абдураҳмонов.

Аввалроқ Фарғона вилояти ҳокими Хайрулло Бозоров ортиқча вазндан халос бўлган амалдор ва фуқароларга ҳар бир килоси учун 500 минг сўмдан пул тўланишини маълум қилганди.

Изоҳ
Асосий янгиликлар