Одатда янги туғилган чақалоқлар вазни кўпи билан 4 килограммгача етиши мумкин. Аммо баъзида катта вазнга эга гўдаклар дунёга келадики, ҳар қандай одам ҳайратланиши аниқ.
Анна Бейтснинг ўғли (Гўдак) —9,98 килограмм
Янги туғилган чақалоқнинг вазни 10 кило бўлиши учун граммлар етмай қолган холос. Боланинг онаси Анна Бейц 1846 йилда туғилган бўлиб, бўйи 241 сантиметр, 1879 йил январда туғилган боласи эса 71,12 сантиметр эди. Чақалоққа исм қўйилмаган бўлса-да, ҳамма уни Гўдак (Baby) деб аташган. Афсуски, бола 11 соатдан кейин вафот этган.
Боланинг отаси Мартин ван Бёрен Бейтс шундай деб ёзган эди: «Унинг бўйи 71 сантиметр, вазни 9,98 килограмм бўлиб, ҳар томонлама соғлом эди. Туғилганда у олти ойлик болага ўхшарди».
Мартиннинг ўзи ҳам турмуш ўртоғи сингари йирик эди: бўйи — 236 сантиметр бўлиб, хотинидан бир оз пастроқ бўлган. Уларнинг иккаласи ҳам цирк труппасида ишлаган, икки йиллик муносабатлардан сўнг турмуш қуришган. Жуфтликнинг 13 нафар фарзанди бўлган, аммо уларнинг баъзилари туғилгандан кўп ўтмай вафот этган.
Акбар Ҳасануддин — 8,7 килограмм
2009 йилда 40 дақиқалик кесарча кесиш амалиётидан сўнг, 41 ёшли Ани Ҳасануддин полвондек ўғилни дунёга келтирди. Аёлдаги глюкоза миқдорининг юқорилиги ва чақалоқнинг ақл бовар қилмайдиган катталигига қарамай, она-боланинг ҳам соғлиғи яхши эди. Чақалоқнинг отаси Муҳаммад «болани боқа олишларига умид қилишини, чунки бундай паҳлавон бошқа болаларга қараганда кўпроқ сут ичишини» айтган.
Надежда Халина — 7,75 килограмм
Татьяна Халина қизи Надеждани дунёга келтириши билан айтган биринчи гапи: «Бўлди, бошқа туғмайман!», бўлди. Уни тушуниш мумкин. Чунки Татьянанинг биринчи фарзанди 4,1 килограмм вазн билан туғилган, аммо кейинги ҳар бир бола янада оғирроқ вазнли бўлиб дунёга келган. Надежда Татьянанинг ўн биринчи қизи бўлди.
Халинлар оиласи Олтой ўлкасининг Алейск шаҳрида яшайди. Шифокорларнинг таъкидлашича, бу камдан кам учрайдиган ҳолатдир, ҳеч ким бундай «сюрприз»ни кутмаганди, чунки на Татьяна, на унинг эри бўйи ёки вазн жиҳатидан бошқалардан фарқ қилмайди.
Адмилтон дос Сантос — 7,7 килограмм
Адмилтон ўртача туғилган чақалоқнинг вазнидан икки баравар катта бўлган ва Бразилиядаги энг оғир туғилган чақалоқ сифатида танилган. Адмилтон Франческа дос Сантоснинг бешинчи фарзанди бўлиб, шифокорлар болани кесарча кесиш йўли билан дунёга келтирган.
Изоҳ (0)