«Ливерпуль» Англия чемпионатида 58 йил аввалги нохуш натижасини такрорлади

«Ливерпуль» Премьер Лига 23-тури доирасида 7 февраль куни кечган баҳсда «Манчестер Сити»га ютқазиб қўйди (1:4).

«Қизиллар» Премьер Лига доирасида кетма-кет учинчи уй ўйинини бой берди. «Ливерпуль» 1963 йилдан буён Англия олий дивизионида «Энфилд»да кетма-кет уч бор ютқазмаганди.

Аввалроқ Юрген Клопп қўл остидаги жамоа ўз майдонида «Брайтон» (0:1) ва «Бёрнли»га (0:1) мағлуб бўлганди. Бундан ташқари «Ливерпуль» ўз уйида кетма-кет 5 ўйиндан буён ғалаба қозона олмаяпти — 3 мағлубият, 2 дуранг.

Мерсисайдликлар АПЛ доирасида 2009 йилнинг апрелидан кейин илк бор ўз майдонидаги ўйинда тўртта гол ўтказиб юборди. 12 йил аввал жамоа «Арсенал»га қарши ўйинда 4:4 ҳисобини қайд этганди.

Шунингдек, «Ливерпуль» барча мусобақалар доирасидаги кетма-кет 19 ўйиндан кейин «Манчестер Сити»га «Энфилд»да мағлуб бўлди. Бундан аввал «Сити» «қизиллар»ни 2003 йилнинг май ойида таслим этганди (2:1).

«Ливерпуль» — «Манчестер Сити» учрашуви видеошарҳини бу ерда томоша қилинг — видео.