G20 давлатлари молия вазирлари жаҳон иқтисодиёти ўсиш суръатлари секинлашишини тахмин қилмоқда. Нисбатан камтарона ўсиш суръатлари бир нечта омиллар туфайли кутилаётган бўлиб, улардан асосийси Хитойда коронавирус тарқалишидир.

«РБК»нинг хабар беришича, бу ҳақда Reuters қўлга киритган 22—23 февраль кунлари Ар-Риёдда бўлиб ўтадиган G20 молия вазирлари ва марказий банк бошқарувчиларининг йиғилишида тақдим этиладиган ҳисоботда айтилган.

«2019 йил охирида барқарорлашув аломатларидан сўнг, 2020—2021 йилларда глобал иқтисодий ўсиш бирмунча секинлашиши кутилмоқда. Унинг тикланишига қулай молиявий шароитлар ва савдо кескинлигини енгиллаштирадиган баъзи белгилар ёрдам беради», — дейилади ҳисобот матнида.

Шунга қарамай, глобал иқтисодий ўсиш секинлигича қолмоқда ва унинг истиқболлари учун хатарлар ҳам сақланиб қолади. Биринчи навбатда бу коронавирус тарқалиши, геосиёсий кескинлик ва сиёсий ноаниқликлар туфайли юзага келади, дейилади якуний кўриниши қабул қилинишидан олдин ўзгартирилиши мумкин бўлган ҳисоботда.

2020 йилда G20’га Саудия Арабистони раислик қилади. 1 декабрдан «Катта йигирмалик» раҳбарлиги Саудия Арабистони қироллиги ихтиёрига ўтди. Саудия Арабистони G20 раҳбарлигида Японияни алмаштирди. Бу мазкур ташкилотнинг араб давлатидаги илк йиғилиши бўлади. Учрашув 22—23 февраль кунлари Ар-Риёдда бўлиб ўтади.

Kyodo агентлигининг хабар беришича, учрашув иштирокчилари, шунингдек, маҳсулот етказиб бериш занжиридаги узилишлар ва сайёҳлар оқимининг пасайишига олиб келган вазият борасида тегишли чораларни муҳокама қилади.

Аввалроқ Хитойда тарқалган янги турдаги коронавирус туфайли мамлакат ҳудудидаги завод ва дўконлар эпидемия оқибатида ёпиб қўйилгани, бу бутун дунёда 5 миллиондан ортиқ компаниялар фаолиятига салбий таъсир кўрсатгани хабар берилган эди.  Fitch халқаро рейтинг агентлиги коронавируснинг тарқалиши Хитойда автомобиль сотиш ҳажмининг пасайишига ва бутун дунё бўйлаб автомобиллар етказиб бериш жараёнининг бузилишига олиб келиши мумкинлигидан огоҳлантирган.

Ҳозирда Хитойдаги асосий саноат тармоқлари бўйича корхоналар коронавирус тарқалиши шароитида ишлаб чиқаришни давом эттиришни бошлади, бироқ ҳали ҳам уларнинг ишини қийинлаштирувчи муаммолар мавжуд. Вирус туфайли Хитойнинг 300 та компанияси 8,2 миллиард АҚШ доллари миқдорида қарз олишни режалаштирмоқда.