Тошкент шаҳар давлат солиқ хизмати органлари томонидан пойтахт бозорларида профилактик тадбирлар ўтказди. Бу ҳақда «Дарё»га Тошкент шаҳар Давлат солиқ бошқармаси матбуот хизмати хабар берди.
Маълум қилинишича, тадбир давомида Бектемир тумани «Қўйлиқ деҳқон бозори» ҳудудида фуқаро Эшонқул Дилмуродов (исм ва фамилиялар ўзгартирилган) рўйхатдан ўтмасдан савдо фаолиятини амалга ошираётгани аниқланди. Натижада 287 дона умумий қиймати 1 миллион 435 минг сўмлик сифатсиз, лицензияланмаган, контрафакт DVD ва CD дисклар далилий ашё сифатида вақтинча олиб қўйилди.
Шунингдек, фуқаро Боймурат Эшматовнинг ҳам ноқонуний фаолиятига чек қўйилди. Ҳеч қандай ҳужжатсиз диск маҳсулотлари билан савдо қилаётган сохта тадбиркордан 263 дона, умумий қиймати 1 миллион 315 минг сўмлик маҳсулотлар далилий ашё сифатида олинди.
Яшнобод туманида ўтказилган профилактик тадбирларда фуқаро Неъматулла Болтаев томонидан «Авиасозлар деҳқон бозори» ёнида жами 350 дона умумий баҳоси 1 миллион 750 минг сўмлик контрафакт дисклар ноқонуний равишда савдога қўйилганлиги аниқланди.
Ҳеч қандай ҳужжатларсиз савдо қилаётган яна бир фуқаро Салоҳиддин Розиқовдан умумий баҳоси 3 миллион 280 минг сўмлик 656 дона контрафакт диск маҳсулотлари вақтинча олиб қўйилди. Ушбу фуқаро ноқонуний савдо фаолиятига вояга етмаган ёшларни ҳам жалб қилган.
«Эски жува деҳқон бозори» ҳудудида ўтказилган тадбирлар давомида 8 нафар фуқаро тегишли тартибда рўйхатдан ўтмасдан тадбиркорлик фаолияти билан шуғулланаётганлиги аниқланиб, улардан жами 1824 дона умумий қиймати 7 миллион 365 минг сўмлик DVD дисклар далилий ашё сифатида вақтинча олиб қўйилди.
Изоҳ (0)