Apple кетма-кет саккизинчи марта дунёдаги энг қиммат бренд деб тан олинди

Американинг Forbes версиясига кўра, Apple бренди кетма-кет саккизинчи марта дунёдаги энг қиммат брендлар рейтингида биринчиликни эгаллади. Журнал унинг қийматини 182,8 миллиард доллар деб баҳолади, бу ўтган йилга нисбатан 8 фоизга кўп демакдир, деб хабар берди «Ведомости».

Рейтингдан иккинчи поғонани 131,1 миллиард доллар билан Google бренди, учинчи ўринни эса 104,9 миллиард доллар билан Microsoft бренди эгаллади.

Шунингдек, рўйхатнинг дастлабки ўнталигидан Facebook (94,8 миллард доллар), Amazon (70,9 миллиард доллар), Coca-Cola (57,3 миллиард доллар), Samsung (47,6 миллиард доллар), Disney (47,5 миллиард доллар), Toyota (44,7 миллиард доллар) ва AT&T (41,9 миллиард доллар) жой олган.

Жорий йилнинг февраль ойида Brand Finance консалтинг компанияси ҳар йилги энг қиммат брендлар рейтингини эълон қилганди. Унинг версиясига кўра, Apple бренди 146,3 миллиард доллар билан 2-ўринни эгаллаган. Биринчи поғона эса Amazon’га (150,8 миллард доллар) насиб этганди.