Лондоннинг «Тоттенҳэм» клуби 6 та гол уриб, Англия Кубогининг чорак финалига йўл олди. 1/4 финал жуфтликлари маълум

Маурисио Почеттино бошчилик қилаётган Лондоннинг «Тоттенҳэм» клуби Англия Кубогининг чорак финалида тўп суради.

Аввалги босқичнинг илк ўйинида «шпорлар» қуйи лига вакили ҳисобланган «Рочдейл» билан 2:2 ҳисобида дуранг ўйнаб қўйганди. Мазкур беллашув Чемпионлар Лигасининг «Ювентус»га қарши ўтказилган ва 2:2 ҳисобида якунига етган ўйинидан кейин бўлиб ўтганди.

Жавоб ўйинида «Тоттенҳэм» рақибига имконият қолдирмади. Шу куни Уго Льорис, Кристиан Эриксен, Ҳарри Кейн каби етакчилар майдонга тушмади. Фернандо Льоренте хет-трик қайд этди. Сон Хён Мин эса 2 та гол уриб, 1 та голли узатма берди. Жамоанинг янги хариди Лукас Моуро ҳамда Эрик Ламела ҳам 2 тадан голли узатмани амалга оширди.

Шунингдек, Уэльснинг «Суонси» клуби ҳам такрорий ўйинда ишончли ғалабага эришиб, навбатдаги босқич йўлланмасини қўлга киритди. Чорак финалда «Тоттенҳэм» ва «Суонси» ўзаро тўқнаш келади. «Манчестер Юнайтед» ярим финал йўлида «Брайтон»ни синовдан ўтказса, «Челси» Лестерда меҳмон бўлади. Шунингдек, «Манчестер Сити»ни турнирдан чиқариб юборган «Уиган» клуби «Саутгемптон»га қарши кураш олиб боради.

Англия Кубоги Нимчорак финал 28 февраль, чоршанба

«Суонси» — «Шеффилд Уэнсдей» 2:0

«Тоттенҳэм» — «Рочдейл» 6:1